Mehmet Çevîren ku li Girtîgeha bi Ewlekariya Bilind a Beşîrî ya Batmanê dihat ragirtin û 11 salan di girtîgehê de bû, doh bi awayekî guman jiyana xwe ji dest da. Cenazeyê Çevîren, li warê wî navçeya Dêrikê ya Mêrdînê hate definkirin.
Cenazeyê Çevîren, ji Nexweşxaneya Dewletê ya Dêrikê hate hilgirtin û birin goristana Taxa Kaleyê ya Dêrikê. Gelek kes tev li merasîma definkirina Çevîren bûn. Di merasîmê de dirûşmên “Bijî berxwedana zindanan” û “Şehîd namirin” hatin berzkirin.
Hevserokê TUHAD-DER’ê yê Mêrdînê Fettah Tekîn piştî definkirina Çevîren axivî û got: “Di vê pêvajoyê de em li bendê bûn hevalên me yên girtî bên berdan lê mixabin di nava mehekê de cenazeyên çar hevalên me ji girtîgehan derketin.”
Hevserokê MEBYA-DER a Mêrdînê Salih Kuday jî got: “Gelê Kurd û Tevgera Azadiyê ya Kurd her tiştê diket ser milê xwe kir. Lê hêj jî zextên hikûmetê berdewam in. Bi sedan girtiyên nexweş bi mirinê rû bi rû ne. Divê girtiyên nexweş tavilê bên berdan.”
Wekîla DEM Partiyê ya Mêrdînê Bêrîtan Guneşê jî got: “Me gelek caran got ku girtîgehên bi tîpên S û Y’ê cihên mirinê ne. Lê tevî vê jî tevdîr negirtin. Li gel vê, heval Mehmet di serdanan de îşkenceyên li girtîgehê vegotiye. Em jî dibêjin ku ev mirin teqez bi destê dewletê bûye. Kesên bûne sedema vê mirinê dê teqez hesabê bidin û em ê vê bişopînin.”
Kekê Çevîren, Welat Çevîren jî diyar kir ku birayê wî teqez întihar nekiriye, ew vê îdiayê qebûl nakin û wê heta dawiyê bişopînin.
