Îro bi hezaran şêniyên Kobanê ji bo oxirkirina 7 şehîdan ku li dem û cihên cuda şehîd bûne, ber bi Pakrewangeha Şehîd Dîcle ketin rê û cenazeyên şervanê QSD’ê Mehmûd Kobanê (Mehmûd Bekir) yê di 26’ê Çileyê de li gundê Mîlê yê girêdayî bajarê Kobanê şehîd bûbû, endamê Hêzên Komandos Xeyal Kobanê (Henîfî El Ehmed) ku di 17`ê Çileyê de li Meskenê şehîd bûbû, Dilşêr Qerarîşk (Yasir Sadûn) ku 23`yê Çileyê li Mîlê şehîd bûbû, Qehreman Xelîl (Azad Xelîl) ku di 18`ê Çileyê de li Tebqayê şehîd bûbû, şervanên YPJ`ê Tolîn Tolhildan (Rama El Kied) ku di 29`ê Adarê de li Hesekê şehîd bû, Hele Serêkaniyê (Emîne Inco) ku 1`ê Adarê li Qamişloyê şehîd bûbû û endamê Hêzê Ewlekariya Hundirîn Elî (Elî Mistefa) ku di 12`ê Nîsanê li Kobanê şehîd bûbû, veşartin.
Piştî ku cenazeyên şehîdan gihaştin pakrewangehê deqeyekê rêz hat girtin û endamê Meclisa Malbatên Şehîdan Elî Ehmed axivî û got: “Şervanên me ew soz da ku ew ê ji bo vî gelî çi dibe bila bibe, parastina ax û rûmeta vî gelî bikin. Malbatên xwe li pey xwe hiştin û ji bo azadiya malbata xwe canê xwe kirin feda. Em jî wek malbatên şehîdan soza şopandina rêya wan didin.”
Dûre ji Rêveberiya Kobanê Rûken Ehmed jî axivî û got: “Em soza serkeftinê didin van şehîdan. Em jî wek hevrêyên wan şehîdan soz didin destkeftiyên ku we bi xwîna xwe dane avakirin, biparêzin.”
Keça şehîd Elî Mistefa Mîdya Mistefa jî li ser bavê xwe axivî û anî ziman ku ew dê heta dawiyê xwedî li rêka bavê xwe derkeve û ew dê li ser wê fikra azad bi ser bikevin.
Piştî wê jî wesîqeyên şehîdan hatin xwendin û radestî malbatan hatin kirin. Şehîd bi tilîlî dirûşman hatin veşartin.
