Şêniyên bajarê Hesekê, li gel endamên saziyên bajêr, cenazeyê şervanê QSD’ê Nemir (Ebdulrehman Elî) spartin axê ji bo endamên Hêzên Ewlekariya Hundirîn (Asayîş) Samir Feyad, Ehmed Xelef, Leys El Zahir, Mihemed El Helhû, Îbrahîm El Salih û Ehed El Hemîdî ku di meha Çileyê de li deverên cuda şehîd bûn, merasîma xiyabî li dar xistin. Merasîm li Goristana Şehîd Dijwar li bajarê Hesekê pêk hat.
Merasîm bi deqeyeke rêzgirtinê dest pê kir. Piştre endama Meclisa Malbatên Şehîdan Xilûd Xelef sersaxî ji malbatên şehîdan re xwest û diyar kir ku ew ê qet qehremaniya şehîdên xwe ji bîr nekin û van şehîdan bi serbilindiyeke mezin ax û rûmeta xwe parastine.
Endamê Komîteya Têkiliyan a Meclisa Leşkerî ya Hesekê Mihemed Dawê jî sersaxî ji malbatên şehîdan re xwest û soz da ku ew ê li ser rêya şehîdan û şervanên xwe bi israr bimînin û destkeftiyên ku şehîdan ji bo wan canê xwe feda kirine biparêzin.
Li ser navê Kongreya Îslama Demokratîk, Şêx Ferhan Etiya axivî û rola şervan û şehîdan di parastina rûmeta gelê herêmê û parastina destkeftiyên wan de nirxand.
Etiyayê got: “Di salên borî de, zarokên me tiştê herî hêja feda kirin da ku em li ser vê axê azad bijîn.”
Piştre, endama Meclisa Malbatên Şehîdan Rojda Ehmed belgeyên şehîdan xwend û radestî malbatên wan kir.
Cenazeyê şehîd Ebdulrehman El Elî li Goristana Şehîd Dijwar spartin axê.
