Roja duyemîn a Festîvala Giyayên Biharê û Xwarinên Kurdewarî ya Binarê Qendîlê, li gundê Êndzê bi beşdariya kesayetên akademîk û civakî, şandeyên hikûmî û hizbî berdewame. Cihê festîvalê bûye navendek ji bo danasîna dewlemendiya xwezayî, çandî û geştiyarî ya herêmê.
Hevserokê Şaredariya Binarê Qendîlê Dilşêr Îbrahîm axivî û bixêrhatina mêvanan, nûnerên aliyên siyasî û saziyên hikûmî û taybet kir û got: “Ev festîval ne tenê festîvala xwarin û geştiyariyê ye, ew her wiha peyameke ji kûrahiya xwezaya Qendîlê ji bo tevahiya Kurdistanê ye.”
Dilşad Îbrahîm diyar kir ku Qendîl navê çiya û xwezayê ye, ew nasname û dîrokeke zindî ya têkoşînê û hevsengiya navbera mirov û jîngehê ye û wiha domand: “Ev festîval hewildaneke ji bo naskirina dewlemendiyên xwezayî û çandî ku bi salane di jiyana xelkê de hatine parastine. Giyayên biharê û xwarinên Kurdewarî ne tenê beşek ji xwarinê, her wiha beşek ji bawerî û jiyana rojane ya xelkê herêmê û peywendiya mirov bi ax û werzan re ye.”
Her wiha Dilşad Îbrahîm da zanîn ku di festîvalê de giyayên biharî yên wek kenger, rêwas, tirşok, lûşik û xwarinên Kurdewarî ji bo naskirina şêwazê jiyana mirovên vê herêmê hatine pêşandan, her wiha standek ji bo pirtûkan hatiye danîn.
Di dewama axaftina xwe de Dilşad Îbrahîm balkişand ser girîngiya parastina jîngehê û wiha pê de çû: “Jîngeh ne tenê mijarekî xwezayî ye, peywendiya wê bi paşeroj û nasnameya civakê re heye. Di heman demê de parastina daristan, çavkaniyên avê û giyayên biharê erkekî nîştimanî û mirovî ye. Rolek giring ya jinê di parastina çand û xwarinên Kurdewarî de heye. Piraniya xwarinên ku îro em pê serbilindin, bi destê jinan hatine parastin û ji bo nifşên pêşerojê hatine veguhastin.”
Hevserokê Şaredariya Binarê Qendîlê Dilşad Îbrahîm di dawiya axaftina xwe de spasiya hemû alî û kesên ku ji bo serkeftina festîvalê alîkarî kirine kir, her wiha hêvî kir ku ev festîval bibe destpêka rêbazeke nû ji bo parastina xwezayê.
Di çarçoveya çalakiyên festîvalê de, semînerên zanistî, pêşbirkên hunerî û werzişî, stran, şano, siwarbûna hespan û firotina bafirokên kaxezî birêve diçin. Armanca van çalakiyan zindîhiştina ruhê çand û hunera Kurdî ye.
Di heman demê de, komîteya amadekar a festîvalê bi rêxistinkirina çalakiyên taybet ji bo zarokan, wekî wênekêşana bi kom û firotina bafirokan, hewl dan ku zarokan di nava hewaya festîvalê de dilxweş bikin.
