Li gorî daxuyaniya rayedarên Belçîkayê, polîs di hefteyên dawî de li gelek deveran, bi taybetî li Limburgê, operasyon pêk anîne. Bi giştî 26 navnîşan hatine serdegirtin û piraniya operasyonan li Limburgê pêk hatine.
Di serdegirtinan de, çek, şûrên Japonî, cebilxane, saetên luks, wesayît û mîqdarek mezin ên pereyan hatine desteserkirin. Ji 18 kesên ku hatine binçavkirin, 7 kes hatine girtin.
Lêpirsîn piştî bûyerên tundiyê yên di nav civaka Tirk a li Limburgê de di sala 2025’an de dest pê kir. Polîsan, diyar kirin ku bûyer bi sûcên rêxistinkirî ve girêdayî ne.
Di encama lêkolînên hatine kirin de, hat tesbîtkirin ku koma bi navê ‘qebîleya Şahîn’ ku destê wan di şûştina pereyan, gefxwarin, zorbazî û sûcên tundiyê de hene bi mafya Tirk re têkiliya wan hene.
Li gorî dosyayê dozgeriyê, rêxistin hin xortên ku li Limburgê dijîn ji bo xebatên tundiyê bi kar dianî.
Serdozgerê Limburgê Frank Bleyen, diyar kir ku bandora mafyaya Tirk li herêmê niha eşkere ye. Wî her wiha destnîşan kir ku hêza polîsan dê giraniyek mezintir bide ser têkoşîna li dijî avahiyên bi vî rengî.
