Bi sedan şêniyên bajarê Kobanê, endamên saziyên Rêveberiya Xweser, partiyên siyasî, rêxistinên jinan şervanên QSD`ê Siyamend Kobanê (Ismaîl Ehmed) û Fîras Kobanê (Diyar Ehmed) ku di 18`ê Çileya 2026`an li ser rêya Ebyed şehîd bûbûn, îro li Pakrewangeha Şehîd Dicle ya Kobanê bi merasîmeke biheybet hatin oxirkirin.
Merasîm bi deqeyek rêzgirtin dest pê kir. Dûre Berdevka Înîsiyatîfa Azadiya Rêber Abdullah Ocalan a Kobanê Eyşe Efendî sersaxî ji malbata her du şehîdan re xwest û soza şopandina rêya şehîdan da.
Eyşe Efendî anî ziman ku şehîdan bê dudilî li hemberî dijminê hovane têkoşiyan û berxwedaneke bêhempa da meşandin û wiha got: “Şehîdan ji bo parastina ax û gelê xwe têkoşîn kirin û heta kêliya dawiyê li ber xwe da. Tişta ku ji me tê xwestin em xwedî li şehîdên xwe derkevin û şopdarên rêya doza wan bin.”
Endamê Fermandariya Leşkerî ya Kobanê Kanî Ehmed anî ziman ku ew ê xwedî li mîrasa şehîdên xwe derkevin û got: “Em hêza xwe ji şehîdên xwe werdigirin. Şehîdên me ji bo parastina ax û gelê xwe ji êrişên dijmin canê xwe feda kir. Divê em jî şopdarên rêya şehîdên xwe bin, xewn û xeyalên wan pêk bînin. Şehîdên me xeta me ya sor e û em ê heta serkeftinê tê bikoşin.”
Piştî axaftinan, wesîqeyên şehadetê hatin xwendin û radestî malbatên wan hatin kirin.
Dûre cenazeyên şehîd Siyamend Kobanê û Fîras Kobanê bi dirûşma “şehîd namirin” hatin veşartin.
