Hevseroka Federasyona Lêkolînên Îslamî ya Mezopotamyayê (MIA-FED) Pervîn Înal krîza rêveberiyê ya li Tirkiyeyê û polîtîkayên hilweşîna civakî yên li cografya Kurdan tê meşandin nirxand. Pervîn Înal anî ziman ku çanda dejenerekirinê ya li bajarên Kurdan hatiye belavkirin xwe dispêre dema avabûna Komarê û destnîşan kir ku rêya rizgariya ji vê dejenerekirinê jî parastina civakî û exlaqê civakî ye.
Pervîn Înal hêsanîkirina peydakirina madeyên narkotîkê li bajarên Kurdan û belavbûna rêxistinên sûc li nava taxan weke “siyaseteke taybet” pênase kir û destnîşan kir ku rejîmên otorîter dixwazin civakê ji koka wê dûr bixîne û bi vî rengî bi rê ve bibe.
Hevseroka MIA-FED’ê diyar kir ku ciwan bi taybetî dibin hedef û axaftina xwe bi vî rengî dewam kir: “Tê xwestin ku li cografya Kurdan nifşekî welê bê afirandin ku dûrî koka xwe ye, dide pey çanda populîst û dejenere. Her qada ku ciwan karibin bi rêya wan têkiliyê bi ziman, dîrok û nasnameya xwe re dîne têne girtin û narkotîk, fûhûş û qadên dîjîtal ên weke TikTok’ê weke yekane rê û qad tê ferzkirin. Zik û ruhê nifşekî birçî tê hiştin, bi vî rengî paşeroj ji wan tê dizîn û tê xwestin ku civak bê îrade bê hiştin. Ev yek projeyeke qirkirina civakî ya bi rêk û pêk e.”
Pervîn Înal destnîşan kir ku ‘bendên exlaqî’ û ‘civaka bi wijdan’ li dijî vê dejenerekirina bi rêk û pêk mertalê herî xurt e û işaret bi rola parêzvaniyê ya nirxên baweriyê kir.
Pervîn Înal got, “Jin divê li taxan qadên nîqaş û çareseriyê ji xwe re ava bikin. Torên piştevaniya jinê divê bikevin meriyetê ku jinek, yan jî dayikek dema bêçare bû dikare serî lê bide.”
Pervîn Înal bal kişand ser êrişên çandî yên bi rêya qumar û medya dîjîtl têne kirin û got, di vê demê de ku hesta şermê û kontrola civakî winda bûye divê jinên Kurd bi nirxên bawerî, çandî û civakî li refên herî pêş bisekine. Pervîn Înal got, “Civaka Kurd divê bi feraseta xwe ya exlaqê bilind li ber vê hilweşîna bi rêk û pêk rabe û parastina xwe li ser zemîna exlaqî-polîtîk ava bike.”
