Berdevka Çapemeniyê ya PJAK’ê Gelawêj Ewrîn, têkildarê nîqaşên li ser daxuyaniyên Serokê DYE Donald Trump ên dibêje “Me çek dane Kurdan’ daxuyaniyek da.
Gelawêj Ewrîn got, “Serokê DYE Donald Trump çek dabin kê bila eşkere bike.” Her wiha bang li partiyên Kurdan jî kir û got, “Kê çi çek wergirtibin bila eşkere bike û zêdetir vê rewşê şêlû nekin.”
Gelawêj Ewrîn, da zanîn ku destwerdaneke nû li ser Îranê heye û ev tişt gotin, “Dibe ku demkurt be lê dê bi bandor be. Li ser mijara ku divê Îran nebe xwedî çekên nukleerî, DYE û Çînê li hev kiriye. Her wiha Tengava Hurmizê ji bo Çînê gelekî girîng e û wê hewl bide bi DYE re hin peymanan çêke.
Em wek PJAK’ê ji Trump re dibêjin ‘Tu nikarî gelê Kurd bi wê yekê sûcdar bikî ku qaşo te çek dane wan û wan jî ew çek bi kar neanîne.’ Em li ser xaka Îran û Rojhilat hene. Hem di qada siyasî hem jî di qada leşkerî de hêza me heye. Me ji tu hêzekê çek wernegirtine. Heke DYE çek dabin hin hêzan, bila bi eşkerayî ragihîne bê ka dane kê û kîjan partiyên siyasî. Bila kes gefan li Kurdan nexwe û nebêje ‘me çek dan we, we jî bi kar neanîn’. Wateya vê gefê ev e ku hem dixwazin Îranê li dijî Kurdan sor bikin hem jî dixwazin bawerî û pêbaweriya gelê me ya bi me bişikînin. Gelê me dizane ku em heta îro bi hêza xwe hatine. Hêza me wê li cihê ku pêwîst bike destwerdana xwe jî bike.
Her wiha partiyên siyasî yên Kurd jî heke ji DYE çek wergirtibin, bila vê yekê bi eşkerayî deynin holê. Şêlûkirina rewşê ya bi vî rengî, ne di berjewendiya tu kesî de ye. Biçûkxistina Kurdan a bi vê rêbazê jî rewşeke ku teqez nayê qebûlkirine. Kurd li herêmê aktorekî serekî ne. Hêza wan jî heye; hêza me ya bingehîn jî gelê me ye.”
