Komîteya Şehîdan a Başûrê Kurdistanê, gora şehîd Berfîn Rêbaz a li goristana Silêmaniyê ziyaret kir. Di ziyaretê de deqeyek rêz hat girtin û hemû şehîdên Kurdistanê hatin bibîranîn.
Armanc Heme Reşîd ku li ser navê Komîteya Şehîdan a Başûrê Kurdistanê peyam xwend, Cejna Qurbanê li hemû gelê Kurd û cîhana Îslamê pîroz kir û di şexsê Şehîd Berfîn de hemû Şehîdên Azadiya Kurdistanê bi bîr anî.
Di daxuyaniyê de hêvî hat xwestin ku ev cejn bibe wesîleya aştiyê û bibe sedema şopandina xeta azadî û demokrasiyê.
Li ser navê malbata Şehîd Berfîn xwişka wê Semîra Ehmed axivî û diyar kir ku Şehîd Berfîn ne tenê di temenekî ciwan de jiyana xwe ji dest daye, lê di heman demê de ji bo wê û malbata wê mîraseke berxwedan û serkeftinê li pey xwe hiştiye.
Semîra Ehmed got: “Berfîn di temenê ciwantiyê de biryara têkoşînê da. Ji bo parastina welatê xwe bû şervanek. Xwedî vîn bû û em bi vê yekê serbilind in. Şehîd Berfîn û hemû şehîd meşale ne û rêya me ronî dikin. Em soz didin şehîdan; em ê di rêya wan de bimeşin.”
Merasîm bi dirûşmeyên “Şehîd namirin” bi dawî bû.
