Di daxuyaniyekê de, Partiyên Hevdîtina Şêwirdariyê ku ji 7 partiyên Kurdan pêk tê, hat gotin: “Hilbijartinên bi navê Meclisa Gel, ku vê dawiyê li parêzgeha Heseke û herêma Kobanê, û berê li Efrîn pêk hatin, dûrî hemû pîvanên demokratîk in. Her wiha dabeşkirina kursiyan bi tevahî rêjeya nifûsa Kurd li Sûriyeyê û pêkhateya demografîk a parêzgeha Hesekê paşguh kir, ji ber ku ew bi awayekî bijartî hat kirin. Vê yekê hesta bêhêvîbûnê di nav Kurdan de kûrtir kiriye.”
Daxuyaniyê wiha domand: “Beşdarbûna hin hêzên siyasî di vê pêvajoyê de şikestin û dabeşbûna di nav civaka Kurd de ku hêviyên mezin li ser encamên konferansa 26`ê Nîsana 2025`an danîne, zêde kiriye. Beşdarbûna hin kesan di pêvajoya hilbijartinê de bêyî şêwirîna partiyên Kurd, bûye sedema zêdekirina dabeşbûna di nav civaka Kurd de.”
Di daxuyaniyê hat gotin: “Tayînkirina kesekî ji gundên Mexmûriyan wek nûnerê Serêkaniyê, şêweyekî rikberî û bêrêziya li hember îradeya gelê Kurd û şêniyên herêmê ye, ji ber ku ev kes ne şêniyê resen ê bajêr e. Ev tayînkirin wekî berdewamiya polîtîkayên nijadperest û hewldanên guhertina demografîk li deverên kurdî tê hesibandin.”
Partiyên Hevdîtina Şêwirdariyê di daxuyaniya xwe de banga xurtkirina diyaloga Kurdî û avakirina helwestek siyasî ya yekgirtî kir, dûrî destwerdana derve û hesabên teng ên partiyan.
Partiyên daxuyanî daye ev in:
Partiya Yekitiya Demokratîk a Kurd li Sûriyeyê
Partiya Demokratîk a Kurd li Sûriyeyê (El Partî)
Partiya Çep a Demokratîk a Kurd li Sûriyeyê
Tevgera Azadiya Kurdistanê li Sûriyeyê
Partiya Rêkeftinaya Demokratîk a Kurd a Sûriyeyê
Partiya Aştiya Demokratîk a Kurdistanê
Partiya Demokratîk a Pêşverû ya Kurd li Sûriyeyê
