Ozgur Ozel, piştî biryara “bêhukmiya teqez” a derbarê partiya xwe de, di mîtînga li Îzmîrê de daxuyaniyên tund dan. Gelek siyasetmedar û welatî beşdarî mîtînga ku li Bulwara Cumhuriyetê hatî kirin bûn.
Ozel, beriya mîtîngê bertek nîşanî destwerdana polîsan a li dijî girseya ku li Qada Cumhuriyetê kom bibûn da û got ku armanca girtina qadê “astengkirina xuyabûna piştgiriya Îzmîrê ya ji bo CHP’ê ye.”
CHP BI AWAYEKÎ FIÎLÎ HATE GIRTIN
Ozel diyar kir ku heke partiya wî ji aliyê kesên hilbijartî ve neyê birêvebirin, ev tê wateya “girtina fiîlî” û wiha got: Di 21’ê Gulana 2026’an de, Recep Tayyip Erdogan û baskê nîv-AK Partî yê ku li gorî fermana wî tevdigere, CHP careke din girtin.
Ozel got, “Heke CHP ji aliyê kesên hilbijartî ve neyê birêvebirin, ew partiya siyasî bi awayekî fiîlî hatiye girtin.”
EM Ê RÊ NEDIN ‘SILTANİYA TEQEZ’
Ozel diyar kir ku Recep Tayyip Erdogan li serê CHP’ê “bêhukmiya teqez” û li serê Tirkiyeyê jî “siltaniya teqez” armanc dike û got ku ew ê rê nedin vê yekê.
Ozel anî ziman ku heke di demeke herî nêz de komcivîn neyê kirin, ew ê ji delegeyan îmzeyan kom bikin û heke hewce bike dê serî li dadgehê bidin. Di rewşa destwerdana li darazê de jî got ku ew ê “biçin cem milet”.
BILA SEROKÊ GIŞTÎ BI DENGÊ 2 MÎLYON ENDAMAN BÊ DIYARKIRIN
Ozel her wiha bang li Serokê Giştî yê berê yê CHP’ê Kemal Kiliçdaroglu kir û pêşniyar kir ku serokê giştî bi dengê 2 mîlyon endamên CHP’ê bê diyarkirin.
Ozel got, “Kemal Beg û kesên ku li ser navê wî diaxivin, gotinên nezelal dikin û dibêjin ’em ê komcivînê bikin’, lê mebesta wan ew e ku demê bikujin û nekin. Heke di demeke herî nêz de nekin, em ê îmzeyên delegeyan kom bikin û komcivînê pêk bînin.”
