Bi wesîleya 14’emîn salvegera Şoreşa 19’ê Tîrmehê, yek ji rêveberên Akademiya Şehîd Deştî ya Gaziyan Egîd Efrîn nirxandin kirin.
Egîd Efrîn di destpêka axaftina xwe Şoreşa 19’ê Tîrmehê li tevahî gelan û mirovahiyê pîroz kir û got, “Şoreşa 19’ê Tîrmehê xwedî mîrasekî pir mezin e. Ev mîras bi ked û têkoşîna şehîdên 14’ê Tîrmehê yên sala 1982’yan çalakiya Rojiya Mirinê ya Mezin dan destpêkirin ava bûye. Eger Şoreşa 19’ê Tîrmehê heya îro li hember her cure êrîş û komployan li ser piyan maye, têk naçe û timî pêş dikeve sedema wê ew ruh û mîrasa ku bi berxwedana Mazlûm, Ferhad, Xeyrî û Kemalan hatiye avakirin e. Ango ev şoreş li ser hîmên saxlem ava bûye. Lewma ne mimkun e kes karibe vê şoreşê bi êrîş, şer û şîddetê ji holê rake. Ev şoreş timî li hember her cure êrîşan xwe nû dike û dibe wesîleya serketinan.”
Gazî Egîd bal kişand ku Şoreşa 19’ê Tîrmehê di zîhniyeta mirovan de guhertin û veguhertineke muezem çêkir û ev anî ziman, “Civak li hember zîhniyeta dewleta netewe, baviksalar, xwedî tundî û bêedalet hişyar kir. Şoreşa 19’ê Tîrmehê şoreşa ziman, çand, huner; şoreşa jin, şoreşa ciwanan û ya herî girîng jî şoreşa civaka exlaqî û polîtîk girt nav xwe û pêş ket. Ji ber vê gel û jin ewqasî xwedî li vê şoreşê derdikevin.”
Rêveberê Akademiya Şehîd Deştî Egîd Efrîn diyar kir ku Şoreşa 19’ê Tîrmehê, nirxên komînal ên demokratîk bi xwe re anîn û wiha domand, “Gel jî li ser vî bingehî xwedî lê derket. Vê şoreşê gelek netewe, civak, ziman û bawerî anîn cem hev. Kir ku bi awayekî azad û wekhev pêkve bijîn. Girêdan û dilsoziyeke dîrokî di nav gelan de çêbû. Ev bêguman bi saya şehîdên ji netewe û baweriyên cuda pêk hat. Ti fitne û fesadî nikare van gelan û baweriyan ji hev dûr bixin û şoreşa wan tine bikin. Di Şoreşa 19’ê Tîrmehê de teorî û pratîk pêkve pêş ket. Xisûsa ‘Fikir, zikir û çalakî’ ya Rêber Apo tîne ziman di Şoreşa 19’ê Tîrmehê berbiçav û şênber bû.”
Egîd destnîşan kir ku çirûska Şoreşa 19’ê Tîrmehê li Kobanê pê ket û çavkaniya wê Rojavayê Kurdistanê bû û wiha axivî, “Bû şoreşa gelan û civaka demokratîk. Tevahî gelên bindest rêya rizgariya xwe û çareseriyê di vê şoreşê de dîtin û xwedî lê derketin. Bêguman Şoreşa 19’ê Tîrmehê bû şoreşa tevahî gelên Sûriyeyê jî. Hemû gel û baweriyên li Sûriyeyê rengê xwe di vê şoreşê de dîtin. Bi qehremantiya şehîdên me yên mezin, keda gaziyên me yên şer û gelên me ev êrîş û komplo hatin pûçkirin.”
Gazî Egîd Efrîn da xuyakirin ku Şoreşa 19’ê Tîrmehê li ser esasê fikrên civaka demokratîk a komînal a Rêber Apo ava bû û got, “Ev şoreş îro bûye wesîleya çaresseriya tevahî pirsgirêkan. Eger îro em xwedî şoreşeke wer bi heybet û bi bandor in, kedeke mezin a Rêbertiya me têde heye. Lewma em deyndarên Rêbertiya xwe ne. Em ê heya dawiyê li ser esasê fikir, felsefe û bîrdoziya Rêber Apo şoreşa xwe pêş bixin.”
Yek ji rêveberên Akademiya Şehîd Deştî û gazî Egîd Efrîn axaftina xwe wiha bi dawî kir, “Di şoreşan de li gor dem û rewşan dibe ku di tarz û rêbazan de guhertin û veguhertin çêbibin. Lê naverok û cewher wekî xwe dimînin. Pêşveçûnên îro rû didin jî divê em li ser vî esasî bigirin dest û fêm bikin. Îro ji her demê bêhtir berpirsiyartî û wezîfe dikevin ser milên me. Barê me ji her demê zêdetir bûne. Lewma divê em hê bêhtir xwedî li şoreşa xwe derkevin, gavên mezintir pêş bixin.”
