Hevseroka Die Linke (Partiya Çep) Ines Schwerdtner, ji sînordarkirina dewletê heta polîtîkayên koçberiyê, ji pêkanînên krîmînalîzekirinê yên li dijî Tevgera Kurd a li Elmanyayê heta lêgerînên aştiyê yên li Tirkiye, Rojava û Rojhilata Navîn, mijarên krîtîk ên rojevê ji bo ANF’ê nirxandin.
‘HEWCEDARÎ BI PARTIYEKE ÇEP A XURT HEYE’
Ines Schwerdtner diyar kir ku jinûve hilbijartina wê wekî erêkirina xeta siyasî ya ku tê meşandin e û destnîşan kir ku encama hatî bidestxistin di partiyê de hêvî û tevgerek nû afirandiye. Hevseroka Partiya Çep, bal kişand ser zêdebûna endamên partiyê di demên dawî de û ev nirxandin kir, “Partiya me di van salên dawî de di gelek xalan de nû bû. Ji mêj ve ye ewqas zîndî û xurt nebûbû; her wiha me gelek endamên ciwan û bi biryar qezenc kirin. Roleke mezin a vê yekê di eleqedarbûna me ya her rojî ya bi pirsgirêkên berbiçav ên mirovan re yên wekî kirêyên bilind û neheqiya civakî de heye. Hikûmeta federal tasfiyekirina dewleta civakî û berfirehkirina qadên leşkerî (militarîzasyon) kûr dike. Ji ber vê yekê jî di parlamentoyê de, li kolanan û li fabrîkeyan hewcedarî bi Partiyeke Çep a xurt heye.”
‘EM KELEHA DEMOKRASIYÊ YA LI CIHÊ KAR Û KOLANAN IN’
Ines Schwerdtner, bal kişand ser pêla rastgir ku li Elmanyayê xurt dibe û mafên demokratîk ên ku tên sînordarkirin. Ines Schwerdtner, diyar kir ku ew ê bi biryardarî parastina mafê grev, xwepêşandan û protestoyê bidomînin. Ines Schwerdtner, partiya xwe wekî “keleha demokrasiyê ya li cihê kar û kolanan” pênase kir û got ku tengbûna qada demokratîk rasterast bandorê li rêxistinên Kurd û komên dij-faşîst jî dike.
Hevseroka Die Linke destnîşan kir ku helwesta wan li dijî qedexeya sembolan û krîmînalîzekirinê zelale û ev tişt gotin, “Die Linke ji roja ku hatiye damezrandin heta niha li gel Tevgera Kurd û gelê Kurd di nav piştgiriyê de ye. Em dibînin ku zext û sînordarkirinên li ser derfetên xwe îfadekirina siyasî ji sînorên Tevgera Kurd derbas bûne. Dema sembol, têgeh an dirûşmên siyasî tên qedexekirin, ev rewş tevgerên demokratîk bi rengekî mezin asteng dike. Ji ber vê yekê divê em di nav piştgiriyê de û bi hev re bisekinin.”
‘EM PIŞTGIRIYA POLÎTÎKAYEKE MIROVANE YA KOÇBERIYÊ Û RÊYÊN EWLE DIKIN’
Ines Schwerdtner behsa nîqaşên li ser koçberiyê yên li Elmanya û Ewropayê jî kir û diyar kir ku hikûmeta federal û partiyên muhafezekar zimanê rastgirên tund pejirandine. Schwerdtner, ligel rexnekirina girtina sînoran û tedbîrên sînordar, careke din banga xwe ya ji bo polîtîkayeke mirovane ya koçberiyê û rêyên ewle yên derketinê dubare kir û ev peyam da: “Lihevhatin û tevlîbûna civakê ne bi rêya cudakariyê, lê bi rêya beşdarbûn, kar, perwerde û têkiliyên civakî pêk tê.”
‘OCALAN Û HEMÛ GIRTIYÊN SIYASÎ DIVÊ BÊNE BERDAN’
Ines Schwerdtner li ser polîtîkaya Die Linke ya Rojhilata Navîn û piştgiriya bi Tevgera Kurd re jî nirxand kir û anî ziman ku ew operasyonên leşkerî yên hikûmeta Tirk ên li dijî Kurdan û êrîşên li ser Rojavayê şermezar dikin. Ines Schwerdtner, destnîşan kir ku divê piştgirî ne demkî be û têkildarê pêvajoya aştiyê jî ev tişt gotin, “Ez piştgiriya di nava raya giştî ya Elmanyayê de ya ji bo tevgerên azadî û berxwedanê yên Kurdan, girîng dibînim. Lê belê, ev yek min aciz dike ku ev piştgirî tenê dema ji bo têkoşîna li dijî DAÎŞ’ê pêwîst be, tê nîşandan. Divê piştevaniya me ne girêdayî wê yekê be bê ka hêzên Kurd xizmeta berjewendiyên Elmanya an jî welatên Rojava dikin an na. Em di têkoşîna wan a ji bo azadî, demokrasiyê û diyarkirina çarenûsa xwe de li kêleka Kurdan in. Divê piştevaniya me bê şert û merc û mayinde be.
Çekdanîna PKK’ê û kişandina hêzên wê gaveke girîng bû. Niha divê aliyê Tirk jî ji bo aştiyê gavên şênber biavêje. Ji bo me; berdana Abdullah Ocalan û hemû girtiyên siyasî yên din û pêşkêşkirina perspektîfek siyasî ji bo siberoja Tevgera Kurd jî di nav vê de ye.”
Ines Schwerdtner, di dawiya axaftina xwe de peyamek ji xwînerên ANF’ê û civaka Kurd re şand û anî ziman ku di partiya wan de gelek hevalên têkoşînê yên Kurd hene û got, “Em dikarin serbilind bin ku em ji bo edaleta civakî, demokrasî, aştî û mafê xwe-diyarkirinê mil bi mil têkoşînê dikin.”
