Li navçeya Farqînê ya Amedê ji bo Şehîdên Têkoşîna Azadiya Kurdistanê bîranîn hat lidarxistin. Li cihê bîranînê wêneyekî mezin ê Rêber Apo û pankartên “Şehîd namirin” û “Şehîdên me rûmeta me ne” hatin daliqandin.
Wêneyên şehîdan li ser maseyan bi rengên kesk, sor û zer û kulîlkan hatin xemilandin. Di rêzgirtinê de sirûda “Çarxa Şoreşê” hat xwendin û dirûşmên “Şehîd namirin”, “Bijî Rêber Apo” û “Rêya şehîdan rêya me ye; Apo ye Serokê me” hatin berzkirin.
Ji bilî nûnerên partiyên siyasî û rêxistinên civaka sivîl, gelek welatî beşdarî bîranînê bûn. Dayikên ku beşdarî bîranînê bûn, malbatên şehîdan yek bi yek silav kirin û li wêneyan nêrîn. Hin dayik bigotina: “Hemû zarokên me ne” êşa malbatan parve kirin. Malbatên şehîdan jî wêneyên şehîdan hilgirtin û bi nîşaneyên serkeftinê bersiv dan dirûşman.
Hevserokê Giştî yê Partiya Herêmên Demokratîk (DBP) Keskîn Bayindir di bîranînê de axivî û diyar kir ku şehîd şahidên têkoşîna azadiya Kurdistanê ne û got: “Em di demên dijwar re derbas dibin. Ev roj ji bo me, ji bo malbatên me, dayikên me û gelê me giran in. Ew hemû şahidên têkoşîna azadiya Kurdistanê ne. Di dîroka Kurdistanê de kesên ku ji bo azadiya gelê xwe canê xwe feda kirine, qet nehatine jibîrkirin û wê qet neyên jibîrkirin.”
Hat ragihandin ku bîranîna ku bi sedan kes beşdar bûn wê sibê jî bidome.
Li taxa Mulûk Sarayê ya Farqînê jî ji bo şehîdan merasîma bîranînê hat lidarxistin. Di bîranînê de deqeyek rêzgirtin hat girtin û dirûşma “Şehîd namirin” hat berzkirin. Wêneyên şehîdan li ser maseyan bi rengên kesk, sor û zer û gulên sor hatin xemilandin.
Nûnerên partiyên siyasî û rêxistinên civaka sivîl û gelek welatiyan serdana cihê bîranînê kirin. Bîranînên wê sibê jî berdewam bike.
BISMIL
Li Bismilê jî ji bo şehîdan merasîma bîranînê hat lidarxistin. Li cihê bîranînê posterê Rêber Apo û pankartên “Şehîd ronahiya rê ya me ye”, “Şehîd namirin” û “Şehîdên me rûmeta me ne” hatin daliqandin.
Wêneyên şehîdan li ser maseyan bi rengên kesk, sor û zer û gulên sor hatin xemilandin. Bîranîna ku bi hezaran kes serdana wê kirin, wê sibê jî berdewam bike.
XANA AXPAR
Bi hezaran kes beşdarî merasîma bîranînê ya li navçeya Xana Axparê bûn. Wêneyên şehîdan li ser maseyan bi rengên kesk, sor û zer û gulên sor hatin xemilandin û bê navber dirûşma “Şehîd namirin” hat berzkirin. Di bîranînê de sînevîzyona li ser şehîdan hatibû amadekirin hat nîşandan.
Hevserokê Giştî yê DBP’ê Keskîn Bayindir di bîranînê de axivî û got: “Ev gel bi saya rêberê rêberan Rêber Apo, van leheng û egîdan îro li cîhanê tên nasîn.”
Malbatên di bîranînê de axivîn, ev tişt anîn ziman: “Şehîd ne tenê yê me ye, yê gelê Kurdistanê ne. Serê me bi wan re bilind e. Em ê şopdarên şehîdan bin. Li seranserê Kurdistanê merasîmên bîranînê tên lidarxistin. Çîrokên wan, çîrokên tevahiya gelê Kurdistanê ye. Hûn hatine sersaxiya xwe. Heya ku gelê Kurd bijî wê doza hevalên me berdewam bike.”
Li taxa Elwendê ya Xana Axparê ji bo şehîd Mervan Zagros (Burhan Temîz) sersaxiyê hat danîn. Nûnerên partiyên siyasî, rêxistinên civaka sivîl û gelek kes beşdarî bîranînê bûn.
Di bîranînê de wêneyê şehîd danîn sr maseyê, rêz hat girtin û dirûşma “Şehîd namirin” hat berzkirin.
Hevserokê DBP’ê yê Amedê Ahmet Dogan di bîranînê de axivî û got: “Van hevalan baweriya xwe bi Rêberê xwe û gelê xwe anînî ji tinebûnê hatin heta vê rojê. Em jî baweriya xwe bi Rêber û tevgera xwe bînin û têbikoşin; Wê demê em dikarin bibin layiqê van şehîdan.”
Bavê şehîd Salih Temiz jî got ku ew ji aştiyê re amade ne û got: “Ez bavê şehîd im. Em ê şopadarê şehîdan bin.”
Her wiha li taxa Hemzê ya Xana Axparê ji bo Firaz Qerejdax (Mehmet Tutan) jî merasîmeke bîranînê hat lidarxistin. Nûnerên partiyên siyasî û rêxistinên civaka sivîl û gelek kes beşdarî bîranînê bûn. Di bîranînê de rêz hat girtin û dirûşma “Şehîd namirin” hat berzkirin.
