Li herêma Kordofan a Rojava ya Sûdanê, ji ber hilweşîna bîrên li kana zêr a Al-Zaraa herî kêm 60 madenkarî jiyana xwe ji dest dan. Li gorî agahiyên ku du madenkaran dan AFP’ê, tê texmînkirin ku hîn jî gelek kes di binê enqazê de ne. Hate ragihandin ku piştî hilweşînê cenazeyên 60 kesî hatin derxistin.
Ji madenkarên ku tevlî karên rizgarkirinê bûn Khair al-Sayyed Jabara diyar kir ku ew nizanin bê çend kes di binê enqazê de mane û tîmên rizgarkirinê tevahiya şevê xebitîn. Jabara ragihand ku ji bo rakirina teht û xakê pêwîstî bi makîneyên kar ên giran heye.
Şerê ku di Nîsana 2023’an de di navbera artêşê û hêza paramîlîter Hêzên Piştevaniya Lezgîn li Sûdanê destpê kir, bandoreke giran li aboriya welêt kir. Gelek kesên ku ji ber şer bêkar man, ji bo karibin debara xwe bikin berê xwe dan madenên zêr ên ku mercên wan ên ewlekariyê gelekî kêm in.
Li Sûdanê beşeke girîng a hilberîna zêr li wan kanan tê kirin ku standartên wan ên ewlekariyê kêm e û gelek caran qeza lê rû didin.
