Di salvegera 4’an a qetilkirina Jîna Emînî de ku li Tehranê hatibû kuştin, jin li gelek bajaran daketin qadan. Jinan destnîşan kirin ku ew ê ji bo jiyan û azadiya xwe têkoşînê bidomînin.
AGIRÎ
Li Agiriyê, bi pêşengiya Tevgera Jinên Azad (TJA) li Kolana Cumhuriyetê daxuyaniya çapemeniyê hat dayîn. Rêxistinên civakî û gelek welatî beşdarî daxuyaniyê bûn. Di çalakiyê de pankarta “Em ê bibin serhildana Jînayê, em ê darvekirinê rawestînin” hat hilgiritn û metna daxuyaniyê ji aliyê Berdevka TJA’ya Agiriyê Dîlan Başboga ve hat xwendin.
Dîlan Başbogayê diyar kir ku ew ê li dijî qetlîamên jinan bi rêxistinkirinê têkoşînê mezin bikin û got: “Rêya yekane ya çareseriyê ya li dijî politîkayên şer ên ku li herêmê tên geşkirin û qetlîamên sîstematîk ên jinan ku ji aliyê rejîmê ve tên kirin, têkoşîna rêxistinbûyî û demokratîkbûna radîkal e ku bi pêşengiya jinan pêş dikeve. Wek TJA em careke din diqîrin: Em ê ne bîlançoya qetlîamên jinan, diyardeya azadî û rêxistinbûna jinan li vê erdnîgariyê serwer bikin.”
Daxuyaniya çapemeniyê bi diruşma “Jin, jiyan, azadî” bi dawî bû.
ŞIRNEX
Li navçeya Hezexê ya Şirnexê di çalakiya ku ji aliyê TJA’yê ve hat lidarxistin de pankarta “Jîna Emînî nemir e, li hember qirkirina jinê têkoşînê mezintir bike, jin jiyan azadî” hat hilgiritn. Di çalakiyê de dovîzên “Ji qirkirina jinê re bêdeng nemîne”, “Rêxistinbûna me azadiya me ye” û “Min porê xwe hûnand, ez derbasî berxwedanê dibim” hatin hilgirtin. Her wiha posterekî mezin ê Jîna Emînî jî hat hilgirtin.
Metna hevpar ji aliyê aktîvîsta TJA’yê Nafiye Geçgel ve hat xwendin.
Parlamentera DEM Partiyê ya Şirnexê Newroz Uysal Aslan ku di daxuyaniyê de axivî û ev tişt got: “Di wê demê de diruşma ‘jin jiyan azadî’ li her derê belav bû û ev mîras heta îro berdewam dike. Ji vir em silavan li hemû kesên ku li Rojhilat di grevê de ne dikin. Di heman demê de em silavan li hemû girtiyên siyasî yên ku di girtîgehan de di greva birçîbûnê de ne dikin. Em ji vir careke din diyar dikin ku em xwedî li berxwedana wan derdikevin. ‘Jin jiyan azadî’ ne tenê ji bo jinên Kurd, ji bo hemû jinên cîhanê bû hişmendî, dirûşm û felsefe. Ev dirûşm felsefeya me ye.”
Daxuyanî bi diruşma “jin, jiyan, azadî” û çepikan bi dawî bû.
