İzzethan Aykut, Hicran Binici, Mehmet Sait Yıldırım, Gülşen Adet, Nuriye Adet, Aydın Altığ, Mahsum Bilem, Levent Cin, Zübeyir İdem, Ömer Okul, Nidayi Tezer, Nurettin Ataman, Ahmed Abdi İbrahim û Tuncay Doğan jî di nav de berdana gelek girtiyên siyasî îsal ji aliyê Desteya Çavdêrî û Îdareyê ve gelek caran hate astengkirin.
Deste di biryarên xwe de hincetên bi rengê “Nêta xwe ya baş nîne”, “Poşman nebûye”, “Bi sûc nehesiya ye”, “Xwe ji fikrê rêxistinî rizgar nekiriye” û “Dibe ku têkiliya bi rêxistinê re dewam bike” bi kar tîne.
Endamê Komîsyona Girtîgehan a Komeleya Hiqûqnasan a ji bo Azadiyê (OHD) parêzer Mehmet Zekî Bînbîr ragihand ku biryarên Desteya Çavdêrî û Îdareyê li dijî hiqûqê ne ku deste di sala 2020’î de qanûnî bû û sala 2021’ê kete meriyetê.
Bînbîr ji ajansa me re axivî û diyar kir ku deste biryarên li derveyî erk û wezîfeya xwe dibirin û bi hincetên neşênber dema ragirtina girtiyên siyasî dirêj dike. Bînbîr got, “li gel ku ne wezîfeya xwe ye darizandinê dike, bi hincetên neşênber înfazê dirêj dike û bi darizandineke duyemîn ceza dike. Li gorî me, armanca vê qanûnê bi temamî siyasî ye. Ji ber ku qanûn tenê li hemberî girtiyên siyasî tê bikaranîn. Têkildarî girtiyên edlî me ti serlêdan negirt. Ya rast qanûneke welê ye ku ji bo zêedekirina zextê ava bûye.”
Bînbîr işaret bi avaniya desteyê kir û anî ziman ku di nava desteyê de weke hiqûqnasan tenê Serdozgerê Komarê û dozgerekî ji aliyê wî ve hatiye wezîfedarkirin hene û got, “Ji bilî wê endamên din ji midûrê desteyê, personel, psîkiyatrî an jî mamosteyan pêk tê.”
‘DADGEH BERSIVA ERÊNÎ NADE’
Bînbîr destnîşan kir ku di serlêdanên li hemberî biryarên desteyê de wan nekarî encamekê werbigirin û axaftina xwe bi vî rengî dewam kir, “Têkildarî vê yekê gelek serlêdanên me û dosyayên me hene ku em dişopînin. Lê belê di halê hazir de dadgehan heta niha bersiveke erênî nedane.”
Encama biryara desteyan taloqkirina berdanê ye. İzzethan Aykut ku diviyabû 16’ê Îlonê bihate berdan, bi hinceta “nêta xwe ya baş nîne” ji bo 3 mehan hate taloqkirin. Aykut ku nexweşiyên dil, astim û vertigo heye, wê di 18’ê Kanûnê de careke din rewşa wî ji aliyê desteyê ve bê nirxandin.
BI HEZARAN GIRTIYÊN NEXWEŞ HENE
Bi taloqkirina berdanê re rewşa girtiyên nexweş hîn lezgîn dibe. Tê gotin, li girtîgehên Tirkiye û Kurdistanê herî kêm hezar û 500 girtiyên nexweş hene, rewşa 335 ji wan giran e.
Parêzer Bînbîr bal kişand ser binpêkirinên di dema veguhestina girtiyên nexweş ji bo nexweşxaneyê û got, “Bi kelepçekirî dibin nexweşxaneyê û heta nava devê wan jî sax dikin. Di pêvajoya heyî de me difikirîn ku ev dikarin kêm bibin, lê belê pirsgirêk dewam dikin.”
Girtiyê bi nexweşiya giran Mehmet Sait Yıldırım ku 33 sal in girtî ye, rojên dawî li van binpPêkirinan rast hat. Berdana Yıldırım ê 75 salî 24’ê Tebaxê ji bo 3 mehan hate taloqkirin. Yıldırım ku piştî hevdîtina desteyê krîza dil derbas kir, rakirin nexweşxaneyê û du stent xistin dilê wî
Yıldırım ku nexweşê hipertansiyon û dil-reh e, yek ji girtiyên bi nexweşiya giran e.
‘EGER JI DIL BIN BILA BERDIN’
Bînbîr destnîşan kir ku bernedana girtiyan ji sererastkirina nû ya qanûnî cuda nikare bê nirxandin û got, ew li bendê ne ku nêzî 4 hezar girtî ji qanûna çarçoveyê sûdê werbigirin û divê ev yek dereng neyê xistin.
Bînbîr got, “Eger dewlet di vê pêvajoyê de ji dil be hingî divê biryarên Desteya Çavdêrî û Îdareyê betal bike û hevalên 30 sal in girtî ne berde.”
