Nobeta ku ji aliyê Tora Têkoşîna li Dijî Tundiyê ya Amedê ve li dijî komkujiyên jinan hatibû destpêkirin, di hefteya xwe ya 2’yemîn de berdewam kir. Di nobeta ku li ber Edliyeya Amedê tê lidarxistin de, pankarta “Jin nobeta edalet û bîrê digirin” û wêneyên jinên ku hatine kuştin hatin hildan. Nûnerên saziyên sivîl, endam û rêveberê partiyên siyasî û gelek jin beşdarî nobetê bûn. Di nobetê de dirûşmeyên “Jin Jiyan Azadî”, “Kuştina Jinan Polîtîk e” û “Neparêze, paqij neke darizîne” hatin berz kirin. Metna çapemeniyê ji aliyê endama Komeleya Jinan a Rosayê Rûşen Yakût ve hate xwendin.
Rûşen Yakût, diyar kir ku di nobeta vê hefteyê de, çîrokên jinên ku di navbera 2’yê Cotmehê heya 12’yê Cotmehê de li bajarên cuda yên Tirkiyeyê jiyana xwe ji dest dane û wan karibûye bigihîjin agahiyên wan, di bîra hevpar de anîne cem hev. Rûşen Yakût, di heman demê de destnîşan kir ku jinên ku di dîrokên berê de, tevî ku piraniya wan serlêdan kiribûn û daxwaza tedbîrên parastinê kiribûn jî hatine kuştin.
Rûşen Yakûtê, destnîşan kir ku ew ê dev ji daxwaza edaletê bernedin wiha axivî: “Em dizanin ku berpirsiyariya me ya derbarê mafê jiyanê yê jinan de, tenê bi wê hefteya ku kuştin tê de çêbûye re sînordar nîn e. Dibe ku di ser mirina jinekê re roj, meh an jî sal derbas bibin. Lê belê daxwaza derxistina rastiyê û peydakirina edaletê bi derbasbûna demê re ji holê ranabe. Ji ber ku ji bo me bîr, bibîrxistin, hiştina şopê û nehiştina jibîrkirinê ye. Edalet; lêgerîna wijdan û rastiyê ye, hevrûbûn û veguhastina berpirsiyariya civakî ya derbarê mafê jiyanê yê jinan de ye ji bo roja îro.”
Piştre çîrokên jinên ku hatine qetilkirin hate xwendin. Jinên ku çîrokan wan hatin xwendin, ev in: “Fusun Yulugkural, Gozde Çelîk, Emel Bozkuş, Fadîme Akbal, Gulşah Oktay, Sakîne Y., Fîkriye Cîn, Canan Bebek, Mercan Kaplan.”
Rûşen Yakût, destnîşan kir ku wan navê Fûsûn, Gozde, Emel, Fadîme, Gulşah, Fîkriye, Sakîne, Canan û Mercanê careke din di bîra xwe ya hevpar de nivîsandin.
Çalakî, bi deqeyeke bêdengiyê û bi xwendina navên jinên hatine kuştin bi dawî bû.
