1’ê Hezîranê li Wargeha Penaberan a Şehîd Rustem Cûdî (Mexmûr) 4’emîn Kongreya Gel bi dirûşmeya ‘Sosyalîzma Netew Dewletê Ber Bi Têkçûyînê, Sosyalîzma Civaka Demokratîk Ber bi Serkeftinê ve Dibe’ hate lidarxistin. Kongre di roja 3’yan de didome. Di kongreyê de pirsgirêkên civakî, pêvajoya Aştî û Civaka Demokratîk, alternatîfa li dijî sîstema netew dewletan, rê û rêbazên komînan û hwd tên nîqaşkirin. Têkildarî vê yekê beşdarên kongreyê ji ANF’ê re axivîn.
‘EM Ê LI GORÎ PÊDIVIYA PÊVAJOYÊ BIMEŞIN’
Neam Pîranî di destpêka axaftina xwe de bal kişand ser azadiya fîzîkî ya Rêber Apo û berxwedana gerîlayan, girtiyên siyasî û şehîdan, silav kir. Neam Pîranî anî ziman ku hêviya wan ew e ku encama kongreyê bibe wesîleya serketinên girîng û destnîşan kir ku ew ê li gorî pêvajoya heyî bimeşin û tişta pêwîst, pêk bînin.
‘YEKANE ALTERNATÎF RÊBER APO YE’
Serbest Pîranî jî 4’emîn Kongreya Wargehê pîroz kir û got, “Ev kongre di demeke hesas de ku Kurd li çarenûsa xwe digerin, hate lidarxistin. Lewma kongreyekî girîng e. Di kongreyê de pirsgirêkên civakî yên heyî tên nîqaşkirin û li çareseriyê tê gerîn. Ev jî bi serê xwe li hemberî pirsgirêkên civakî û xitimîna heyî, serketinek e.”
Serbest Pîranî destnîşan kir ku ev kongre di heman demê de li dijî hêzên hegemon û herêmî yên dîktator û cîhadîst, weke bersivekê ye û got, “Mexmûr bi rê û rêbazên xwe yên nîqaşkirina pirsgirêkan, ji herêmê re dibe modelek. Bi fikrê Rêber Apo û rê û rêbazên komînan, konferansan û kongreyan ji bo ku gel bixwe pirsgirêkên xwe çareser bike îradeyeke gel derdikeve pêş. Ev alternatîfeke civakî ye. Em dibînin ku, netew dewletên heyî ji bo civakê nebûne bersiv, xitimandineke mezin heye. Ev hêzên statukoger ên ku hegemontiya xwe li ser civakê disepînin, bi salan ji civakê didizin. Yekane alternatîfa civakî, Rêber Apo ye. Li dijî van hêzên hegemon, Rêber Apo rê û rêbaza komînan ji me re diyar kiriye.”
