Li Tîran a paytextê Albanyayê bi hesaran kesî li hemberî projeyên tûrîzmê yên luks ku têkiliya wan li gel Jared Kushner ê zavayê Trump heye protesto li dar xistin.
Xwepêşanderan di çalakiya ku du rojan ser hev hate lidarxistin de alên Albanyayê hilgirtin, ber bi bînaya hikûmetê ve meşiyan û bang li Serokwezîr Edi Rama kirin ku projeyan betal bike. Her wiha di çalakiyê de pankartên bi nivîsên ‘’Albanya ne ya firotinê ye’’ û ‘’Ivanka vegere malê’’ hatin vekirin.
PROJEYÊN TÛRÎZMÊ YÊN BINÎQAŞ
Yek ji projeya ku du salan beriya niha hate eşkerekirin, armanc dike ku girava Sazan Islandê ya li Behra Adrîyatîkê veguherîne navendeke tûrîzmê ya luks. Hawirparêz û gelê xwecihî li hemberî pêşeroja girava berbehs nerazîbûnên xwe nîşan didin.
Projeya din jî têkildarî qeraxa Zvernecê ye ku cihê berbehs di bin parastinê de ye.
DOZGERIYÊ LÊPIRSÎN DA DESTPÊKIRIN
Dozgeriya Têkoşîna Li Dijî Sûcên Organîzekirî û Gendeliya Taybet a Albanyayê (SPAK) da zanîn ku wê di çarçoveya projeya Zvernecê de lêpirsîn daye destpêkirin.
Dozgeriyê diyar kir ku hin mafên milkiyetê piştre ji veberdêran re hatine dewrkirin lê belê têkildarî têkiliya li gel Jared Kushner a rasterast detayek neda.
HAWIRPARÊZ Û AKTÎVÎST NERAZÎBÛNÊN XWE NÎŞAN DIDIN
Di protestoya ku hefteya borî ya li Zvernecê hate lidarxistin de daxwaza rakirina têlên ku çûna ber bi qeraxê ve asteng dikin hatibû kirin. Hate ragihandin ku di dema xwepêşandanê de erkdarên ewlehiya taybet êrîşî xwepêşanderan kiriye û gelek kes birîndar bûne.
Di meha Çileyê de jî nêzîkî 40 rêxistinên xwezayê diyar kirin ku proje li ser cureyên biyolojîk û jiyana xwezayî weke gefeke cidî ne û daxwaxa sekinandina xebatan hatibû kirin. Xwepêşander ji hikûmetê daxwaz dikin ku hemû pêvajoyên têkildarî projeyan bi zelalî li gel raya giştî werin parvekirin.
