Meclisa Malbatên Şehîdan a bajarê Hesekê ji bo şervanê Hêzên Komando yên Hêzên Sûriyeya Demokratîk Ehmed Hemdan El Ewad (Sîpan) ku 21’ê Adarê di berxwedana li bendava Tişrînê de şehîd bibû, mersîmek li dar xist. Merasîm bi beşdariya şêniyên bajarê Hesekê û gundewarên wê li mezargeha Şehîd Dijwar a li gundê Dawidiyê hate lidarxistin.
Merasîm bi deqîqeyek rêzgirtinê dest pê kir, piştre endama Meclîsa Malbatên Şehîdan li bajarê Hesekê Rawan Şêxo axivî û wiha got: “Şehîdan ji bo azadiya pêkhateyên herêmên Bakur û Rojhilatê Sûriyeyê canê xwe feda kirin. Şehîd Ehmed mînaka herî mezin a vê yekê ye ku bi dilsozî li ber xwe da û ji bo parastina destkeftiyên şoreşa 19’ê Tîrmehê canê xwe feda kir.”
Ji fermandarên Meclîsa Leşkerî ya Hesekê Dêrsim Hesekê diyar kirk u “Şehîd Ehmed El Ewad zêdetirî 8 salan têkoşiya û berdêlên mezin da ji bo ku gelê Bakur û Rojhilatê Sûriyê li gorî rêgezên biratiya gelan û jiyana hevbeş di nava azadî û aştiyê de bijîn.”
Dêrsîm Hesekê soza şopandina rêya şehîdan da, heta ku armanc û hêviyên wan ên avakirina Sûriyeke azad pêk werin.
Endama Meclîsa Malbatên Şehîdan a bajarê Hesekê Necah Hewas belgenameya şehadetê ya şehîd Ehmed El Ewad xwend û radestî malbata wî kir.
Cenazeyê şehîd Ehmed bi tilîlî û dirûşmeyan spartin axê.
