Berxwedana ku di 14’ê Tîrmehê de li girtîgeha Amedê destpê kir mohra xwe li dîroka gelê Kurd xist. Ev berxwedana ku li dijî sîstema yek dewlet, yek miletê destpê kir, di heman demê de bû têkoşîna gerîlayên azadiyê ya salên dawî ku li dijî dagirkeriyê meşandin. Li hemberî êrişên qirkirinê yên dewleta Tirk ên li dijî gelê Kurd, li zindana Amedê berxwedaneke mezin hate nîşandan. Ji kadroyên pêşeng ên PKK’ê Mehmet Hayrî Dûrmûş, Kemal Pîr, Alî Çîçek û Akîf Yilmaz ên di berxwedanê de şehîd bûn, bi berxwedana xwe rêyeke nû ji têkoşîna azadiyê re vekirin.
Gerîlayên Azadiyê Zîlan Devrîm û Baran Zindan şehîdên 14’ê Tîrmehê bi bîr anîn.
Gerîlaya YJA Starê Zîlan Devrîm diyar kir ku şehîd Kemal Pîr, Mehmet Hayrî Dûrmûş, Alî Çîçek û Akîf Yilmaz li zindana Amedê li dijî zilm û zexta dijmin berxwedaneke bêhema nîşan dan û got, “Berxwedêrên 14’ê Tîrmehê pêşengî ji me re kirin. Em îro hîn jî li ser şopa wan dimeşin. Ev hevrê ji bo Kurdistaneke azad û serbixwe li ber xwe dan û şehîd bûn. Li Girtîgeha Amedê li dijî hevrêyên me zilmeke giran a Kenan Evren û Esat Oktay dihate meşandin. Di heman demê de êrişeke mezin li ser tevgera me hebû. Dema destpêkê ya pêvajoya damezrandina partiyê bû û dijmin dixwest bi şikandina îrdeya van hevalan tevgera me tasfiye bike. Lê belê van hevalan berxwedaneke welê mezin nîşan dan ku nehiştin dijmin bi gavekê jî bi pêş ve biçin. Tevgera me jî bi saya vê berxwedan, têkoşîn û dilsoziya bi şehîdan re bi pêşengiya Rêber Apo gihîşt vê astê.
Li Girtîgeha Amedê bi rastî jî berxwedaneke mezin hate nîşandan. Vê berxwedanê rê, xet û îdeolojiyek ji bo me afirand. Ji ber ku ev heval dilsozê Rêber Apo bûn, hevrêyên wî bûn. Wan rêya me ronî kirin û kirin ku em bigihêjin vê astê. Bi rastî jî Mehmet Hayrî Dûrmûş, Kemal Pîr, Alî Çîçek û Akîf Yilmaz di berxwedana Girtîgeha AMedê de ji gelê me û me re bûn pêşeng. Di berxwedana şerê tunelan a salên dawî de gerîlayan berxwedana 14’ê Tîrmehê ji xwe re kirin esas û ti carî serî li ber dijmin netewandin. Ji ber vê yekê jî em ê bidin ser şopa wan. Em careke din Mehmet Hayrî Dûrmûş, Kemal Pîr, Alî Çîçek û Akîf Yilmaz ên di berxwedana 14’ê Tîrmehê de canê xwe feda kirin bi bîr tînin, bi rêzdarî bejna xwe li ber bîranîna wan ditewînin.”
‘BERXWEDANA 14’Ê TÎRMEHÊ DEWLETA TIRK BÊÇARE HIŞT’
Gerîlayê HPG’ê Baran Devrîm jî şehîdên 14’ê Tîrmehê bi bîr anî û got, “Hevalên me yên di berxwedana 14’ê Tîrmehê de şehîd bûn bi hurmet bi bîr tînim. 14’ê Tîrmehê ji bo me rojeke pîroz e. Ew roj e ku derbeke mezin li sîstema serwer hate xistin. Di rojên bi vî rengî gigrîng de hemû çalakiyên hatin lidarxistin di asta îdeolojîk de bûn. Hevalên li Girtîgeha AMedê li ber xwe dan têkoşîna wan ji bo jiyaneke wekhev û welatekî azad bû. Li gel êşkence û zilma giran Mehmet Hayrî Dûrmûş, Kemal Pîr, Alî Çîçek û Akîf Yilmaz li ber xwe dan û têkoşîna wan bi ser ket. Ruhê 14’ê Tîrmehê îro jî dewam dike. Îro jî gelek hevalên me Û gelê me li girtîgehên dewleta Tirkiyeyê li ber xwe didin. Dema ku mirov li van hevalan dinihêrin, dibînin ku têkiliya hevrêtiyê ya navbera wan çiqasî xurt e.
Ev berxwedan sembola hevrêtiya bi Rêber Apo re ye. Mehmet Hayrî Dûrmûş, Kemal Pîr, Alî Çîçek û Akîf Yilmaz bi berxwedana xwe dewleta Tirk bêçare hiştin. Dewleta Tirk bi polîtîkayên cuda xwest bigihêje armanca xwe, lê belê berxwedana van hevalan ew planên wan pûç kir. Ruhê berxwedana wan li çiyê, bajaran û girtîgehan hîn jî dewam dike. Gelek hevrêyên me yên fedaî bi ruhê berxwedana 14’ê Tîrmehê gihîştin asta şehadetê. Ruhê vê berxwedanê heta pêkanîna azadiya fîzîkî ya Rêber Apo wê dewam bike.”
