Meclîsa Dayikên Aştiyê li avahiya Rêxistina Navçeya Cizîrê ya Şirnexê ya Partiya Demokrasî û Wekheviyê ya Gelan (DEM Partî) daxuyaniyek da.
Di daxuyaniyê de ku gelek dayik amade bûn, hate destnîşankirin ku aştî bi yek alî nabe.
Dayika Aştiyê Hatîce Baytûr got, “Divê herdu alî agirbestê ragihînin. Em êdî naxwazin cenazeyên zarokên xwe werbigirin. Ev pêvajo bi rengekî yekalî nameşe.”
Hatîce Baytûr bi dewamî got, “Weke Dayikên Aştiyê em destê aştî, xwişk û biratiyê dirêj dikin. Em dibêjin êdî bes e ji mirina mirovan re. Me ji bo aştiyê destê xwe dirêj kir, niha jî divê dayikên leşkeran ji bo aştiyê destê xwe dirêj bike.”
Asya Tay jî got, “Ne Kurd ne jî Tirk em naxwazin dayik bigirîn. Madem me gotiye aştî; divê em destê xwe dirêjî hev bikin û hev hembêz bikin.”
Kûmrî Babat jî got, “Em dixwazin li Rojhilata Navîn aştî pêk were. Divê dewlet guh bide vê peyamê. Em naxwazin êdî kes bimire.”
EDENE
Li Edeneyê Meclîsa Edeneyê ya Dayikên Aştiyê li Parka Înonu daxuyanî da. Berdevka meclîsê Sûphiye Bayav jî anî ziman ku aştî bi yekalî nabe, ji bo kes nemire divê çek bêne bêdengkirin û dewlet ji bo aştiyê gavê biavêje.
Dayika Aştiyê Azîze Gultekîn got, “Agirbest bi yekalî nabe, divê herdu alî agirbestê ragihînin. Divê êdî herdu alî çekan bêdeng bikin. Banga me li dayikên leşker û polîsan e; em dibêjin vaye pêvajoyeke nû destpê kiriye. Hûn jî werin, em dest bidin hev. Ne bila canê we bişewite ne jî canê me. Ne rondikên we bibarin ne jî yên me. Em bi hev re aştiyê ava bikin. Eger dewlet aştiyeke rasteqîn dixwaze bila vî şerî bisekinîne.”
