Berdevka Partiya Demokrasî û Wekheviyê ya Gelan (DEM Partî) Ayşegul Dogan li navenda giştî ya partiyê di civîna çapemeniyê de ragihand ku ji bo hevdîtina sêyemîn a bi Rêber Apo re bê kirin wan serlêdan kirine.
Ayşegul Dogan diyar kir ku ew li bendê ne heyeta Îmraliyê di demeke kurt de biçe Îmraliyê û got, “Ji bo jiyaneke nû bê afirandin, em ji doh bêhtir bi hêvî û coşeke mezin li benda daxuyaniya dîrokî ya Birêz Ocalan e. Me ji vê derê gelek caran gotibûn. Gotin hate gotin. Gotineke ku nabe bê taloqkirin. Me got, gotineke hêja ye. Me çi got? Em li ber destpêka jiyaneke nû ne. Yek ji hêmanên bingehîn ên afirandina vê jiyana nû jî rêdayina li vê gotinê ye. Eger em rê bidin vê gotinê, rêyên gotinê bi hev re ava bikin, hingî wê pîvanên hiqûqa demokratîk bi cih bên. Armanca me ya ji bo civakeke demokratîk wê pêk were. Ji ber vê yekê dem ew dem e ku em bi wêrekî û bêtirs ji bo aştî, guherîn û veguherîna demokratîk hewl bidin, piştgiriyê bidin.”
Li ser pira, gelo wê di nava heyetê de kesekî din hebe yan na, Ayşegul Dogan got, “Me têkildarî Ahmet Turk serlêdan kir. Ji ber ku hîn bersiv ji serlêdanê re nehatiye dayin, em nikarin piştrast bikin bê Ahmet Turk wê di nava heyetê de be yan na. Lê belê di nava kesên ji bo çûyînê serlêdana wan hatiye kirin de Ahmet Turk jî heye.”
