Komîsyona Zarokan a DEM Partiyê, têkîldarê mirina zarokên li MESEM’ê tên xebitandin li Navenda Giştî ya DEM Partiyê civîneke çapemeniyê lidar xist. Hevberdevkê Komîsyona Zarokan Îhsan Seylan daxuyanî da û ev tişt gotin:
EWLEHIYA ZAROKAN NÎNE
“Duh li Rihayê 5 zarok dema li peyarê bûn, wesayîtek li wan dixe û jiyana xwe ji dest didin. Ji vê qezayê mirov fêm dike ku ewlehiya zarokan li dibistan, kolan, qadên lîstikê û li hemû qadên jiyanê nîne. Em sersaxî ji malbatê zarokên ku jiyana xwe ji dest dane re dixwazin. Gelo wezîfeya desthilatdariyê pêşîgirtina li qezayên mîna van e ango mîna ku bi rojane dikin hemû hêza xwe ji bo jêbirina nivîsên Kurdî ‘Pêşî Peya, Hêdî’ xerckirine? Em ji vir dubare vê pirsê dikin.
GELEK ZAROKÊN HATINE REVANDIN LI TIRKIYEYÊ NE
Em baş dizanin ku yên ji hawirên şer û pevçûnan herî zêde bandor dibin, zarok in. Di 3’yê Tebaxa 2014’an de di encama êrîşa çeteyên DAÎŞ’ê ya li ser Şengalê de bi hezaran zarok û jin hatin revandin. Li dijî nasname, bawerî û şêweyên jiyanê yên zarokên Êzidî yên bi zorê hatine revandin, polîtîkayên asîmîlasyonê hatin meşandin. Em dizanin gelek zarokên hatine revandin li Tirkiyeyê ne. Tevî hemû hewldanên me desthilatdarî heta roja îro ji bo tesbîtkirina hejmara van zarokan xebatek nedaye meşandin. Rêxistinên sivîl ên navneteweyî duh daneyên xwe di raya giştî de parvekirin. Tevî ku hejmar ne zelal e jî herî kêm 1300 zarok hînê winda ne. 10 sal li ser Qirkirina Êzidiyan re derbas dibe, heta roja îro eqûbeta zarokên winda nezanîn, gelek bi êş e. Em diyar dikin ku me vê êşê ji bîr nekiriye. Em careke din soz didin ku ji bo zarokên li Tirkiye, Kurdistan, Rojhilata Navîn û tevahiya cîhanê di nava hawireke ewle de bi rengekî tendurist mezin bibin, em ê têbikoşin!
MIRINA ZAROKAN ENCAMA POLÎTÎKAYÊN AKP’Ê NE
Her wiha ji bo hêrsa AKP’ê yê sermayê li MESEM’ê, kargeh û zeviyan, mirina zarokan dewam dike. Tenê hefteya dawî 4 zarok di encama cînayeta kar de hatin qetilkirin. Lê ev rewş di raya giştî de biqasî tê xwestin deng veneda. Di rastiyê de daxuyaniyên rayedaran her tişt eşkere dike. Em her roj ji MESEM’ê agahiya kuştina zarokan a nû dibihîzin, ji aliyê wezîr bi xwe ve ev yek tê parastin. Ev yek jî nîşan dide ev der ji bo berjewendî û qezencê bê çavdêrî tên hiştin. Mirina zarokan di cînayetên kar de, encama biryarên aborî-polîtîk ên desthilatdariyê ye! Li gorî daneyên Meclîsa Ewlekariya Kar û Tenduristiya Karkeran (ÎSÎG), par di cînayetên kar de herî kêm 54 zarokan jiyana xwe ji dest dan. Di nava 5 mehên ewil ên vê salê jî 24 zarokên karker jiyana xwe ji dest dane. Di nava 11 salan de jî bi giştî 671 zarok jiyana xwe ji dest dane. Her çend ev hejmar bê veşartin jî li gorî rêxistinên sivîl, nêzî 4 mîlyon zarok tên xebitandin.
Li Tirkiyeyê berhevkirina sermayeyê li ser keda zarokan e. Polîtîkayên aboriyê û îstîsmariya kedê ya desthilatdariya AKP-MHP’ê ji şert û mercên hov ên kapîtalîst ne cudatir e. Em ê parastina mafên zarokan ku kirdeyê jiyanê ne, bidomînin; Em ê bi hev re bi zarokan re cîhaneke azad, adîl û ewle ava bikin. Em ê bi hev re jiyaneke ku tê de zarok nebin karker ava bikin. Zarok, jiyan, azadî!”
