Malbat, hevalên Denîz Poyraz, Dayikên Aştiyê, Tevgera Jinên Azad (TJA), rêxistinên bajar û navçeyan ên Partiya Wekhevî û Demokrasiyê ya Gelan (DEM Partî), parlamenterên DEM Partiyê Adalet Kaya û Burcugul Çubuk, her wiha gelek nûnerên partiyên siyasî, rêxistinên girseyî yên demokratîk û welatî beşdarî bîranînê bûn.
Merasîmê bi rêzgirtina ji bo şehîdên têkoşîna azadî û demokrasiyê dest pê kir.
Endama Dayikên Aştiyê Muzeyyen Kortak di merasîmê de axivî û got: “Şehîdên me rûmeta me ne. Em ê şopdarên şehîdên xwe bin.”
Pişte Parlamentera Amedê ya DEM Partiyê Adalet Kaya axivî û diyar kir ku êriş, êrişeke polîtîk e û wiha axivî: ‘’Ev êrîş, êrîşeke li hemberî aşitiyê, wekheviyê û îradeya pêkvejiyanê bû. Denîz Poyraz nûnera bi milyonan bû. Ev êrîşeke poltîk bû. Em ê biranîn û têkoşîna wê mezin bikin.’’
Dayika Denîz Poyraz Fehîme Payraz jî di bîranînê de axivî û diyar kir ku ew bi biryar in ku têkoşîna keça xwe bidomînin û ev yek anîn ziman: ‘’Ev têkoşîn, têkoşîna jinan û ciwanan e. Heke em bibin yek kesek nikare me têk bibe. Di kijan şert û mercî jî de be em ê berpirsiyariya xwe pêk bînin.”
Merasîma bîranînê bi berzkirina dirûşmeya “Şehîd namirin” bi dawî bû. Piştre jî li Bînaya Rêxistina Bajêr a DEM Partiyê ji bo bîranîna Denîz Poyraz sînevîzyonek hate nîşandan.
