Newrozeke din derbas bû. Îsal li gorî salên derbasbûyî ji pêvajo û pêşketinên girîng re şahidî kir, lewma Newroz îsal jî hîn bi wate bû. Hem Kurdan hem jî dewleta Tirk meraq kirin bê Newroz wê çawa derbas bibe û gelê Kurd wê di kîjan astê de tevlî bibe.
Qadên Newrozê bi taybetî li Bakurê Kurdistanê û Tirkiyeyê ne tenê cejnek bû. Newrozên ku bi salan e li Tirkiye û Bakur tê pîrozkirin, timî weke beyana îradeyê bû. Sala 2025’an jî beyana îradeyê, helwesta gelê Kurd a li pêşberî banga dawî ya Rêber Apo dihate meraqkirin. Beriya Newroza 2025’an banga Rêber Apo ya li PKK’ê gelekî hate nîqaşkirin, axaftin û hate îdîakirin ku gelê Kurd ji banga Rêber Apo aciz e, têkiliya xwe ya pê re qut kiriye. Lê belê piştî ku agirê Newrozê hate dadan, eşkere bû ku rastî bi vî rengî nîne.
Stenbol weke bajarê herî mezin ê Kurdan ê li Tirkiyeyê tê naskirin. Ji ber vê yekê piştî Newroza Amedê bal hemû li ser Newroza li Stenbolê bû. Piştî banga dîrokî ya Rêber Apo jî bal li ser Amed û Stenbolê bû. Stenbolê îro careke din nîşan da ku ew bi Rêber Apo re ye.
DIRÛŞMA ‘BIJÎ SEROK APO’ TEVAHIYA ROJÊ DEWAM KIR
Komîteya Amadekar a Newrozê ji bo kombûnê saet 10’an bang kiribû, lê belê Kurd du saet berê herikîn qada Newrozê. Bi saet 10’an re di nava çend deqeyan de pêşiya dikê tijî bû. Bi ketina mirovan a li qadê re herî zêde hebûna jin û ciwanan bal kişand. Rewşeke din a ku li ketina qadê bal kişand ew bû ku dirûşmên ‘Bijî Serok Apo’ û ‘Jin, Jiyan, Azadî’ deng vedan. Di nava saetekê de qad tijî bû.
Di dema axaftinan de jî herî zêde gava navê Rêber Apo dihate bilêvkirin çepik lê dihate xistin. Wêneyê ciwantiyê yê Rêber Apo û wêneyê wî yê dawiyê li ekranê hate nîşandan û coşa girseyê bi vê yekê re hîn zêde bû. Bi sed hezaran kesî bi carekê dirûşma ‘Bijî Serok Apo’ qîriyan.
DEMA KU DENGÊ RÊBER APO HATE BIHÎSTIN HINEK GIRIYAN
Kêliya ku herî zêde hestewar bûm ew kêlî bû, ku dema ji bo kişandina wêne ketim nava qadê, ciwanekî ji telefona xwe ya destan wêneyek nîşan da û xwest, li qadê wêneyê wî bikişînim. Ciwan wêneyê kekê xwe yê şervanê YPG’ê yê şehîd bûye nîşan da û xwest, wêneyê wî yê li gel wêneyê kekê xwe û qadê bi hev re bikişînim. Xwestibû di vê Newroza dîrokî de kekê wî yê şehîd jî li wir be. Bi taybetî dilsoziya ciwanan a li Rêber Apo bal dikişand. Posterên biçûk û mezin ên Rêber Apo timî li qadê dihatin gerandin.
Dema ku ji dengê Rêber Apo peyameke kurt a Newrozê hate xwendin, min dît bê ev dilsozî çiqasî xurt e. Dema ku dengê Rêber Apo hate bihîstin dirûşm bi carekê sekinîn; hinek ji beşdaran bi barandina rondikên çavan li peyamê guhdarî kirin. Piştre jî girseya gel bi hev re dirûşma ‘Bijî Serok Apo’ qîriya.
KURDAN BERSIV DAN MANSÛR YAVAŞ
Kurdan li Stenbolê bersiv dan her kesî. Ji desthilatdariyê re got, ‘Di dilsoziya me ya bi Rêber Apo re ti guhertin nîne’, ji CHP’ê re jî bersiva pêwîst da.
Bi taybetî gotina Şaredarê Bajarê Mezin ê Enqereyê Mansûr Yavaş ku ji bo ala Kurdistanê ya li Newroza li Cizîrê hate hildan gotibû, ‘paçik’ li qadê bû cihê nerazîbûnê. Danê êvarê jî Ozgur Ozel neçar mabû ku ji ber gotinên Mansûr Yavaş lêborînê bixwaze.
Kurdan li Stenbolê dilsoziya xwe ya bi Rêber Apo û Tevgera Azadiyê ya Kurd re careke din nîşan dan. Her wiha nîşan dan ku ew leşkerê kesî nîne, heta dawiyê li pişt rêberê xwe ne û îradeya xwe bi xurtî beyan kir.
