Danê sibehê Serokê Şaredariya Bajarê Mezin ê Stenbolê yê CHP’yî Ekrem Îmamoglu û gelek kes hatin binçavkirin.
Hevserokên Giştî yên DEM Partiyê li ser hesaba xwe, bi daxuyaniyekê nerazîbûn nîşanî operasyonên binçavkirinê dan.
Hevseroka Giştî ya DEM Partî Tulay Hatîmogullari got: “Serokê Şaredariya Stenbolê Ekrem Îmamoglu jî di nav de, serokê şaredariyên navçeyê, rojnamevan û bi dehan kes sibê di encama serdegirtina malan de hatin binçavkirin! Ev binçavkirin nayê qebûlkirin. Bi tundî red dikin. Ev operasyon operasyoneke siyasî ye ku sînorên hiqûqê nas nake. Ji bo xatirê deng, sindoq û meqamê rageşiya civakî û berberiya li Tirkiyeyê ber bi cihekî ku nayê vegerandin ve tê birin. Binçavkirina Şaredarê bajarê herî mezin ê vî welatî, eybeke mezin e ku bi sedan sal neyê jibîrkirin. Ev operasyona ku baweriya bi edaletê dişikîne, dîzaynkirina siyasetê ji aliyê dadgeriyê ve ye.
Ya ku pêwîstiya Tirkiyeyê pê heye ne zexte, demokrasî û hiqûqeke xurtir e. Edalet tê xespkirin, ev rê şaş e. Divê Îmamoglu û kesên hatine binçavkirin serbest bên berdan.”
Hevserokê Giştî yê DEM Partî Tuncer Bakirhan, jî diyar kir ku ew bêhiqûqiya li dijî vîna gel tê kirin bi tundî red û şermezar dikin û got ku divê ev rêya xelet ji holê bê rakirin û rêz li îradeya gel bê girtin. Bakirhan, da xuyakirin, ku ew weke DEM’ê dê li dijî zextên li ser siyaseta demokratîk bisekinin û got, ew li cem gelê Stenbolê û hemû beşên civakê yên ji bo demokrasiyê têdikoşin in û xwest, Ekrem Îmamoglu û hemû kesên hatine binçavkirin tavilê bên berdan.
