Di dîroka 16’yê Îlona 2022’an de jina Kurd a bi navê Jîna Emînî li Paytexta Îranê Tehranê ji aliyê dewleta Îranê ve bi awayekê hovane hate qetilkirin. Piştî qetilkirina Jîna Emînî gelê Rojhilatê Kurdistanê û Îranê li hemberî sîstema kujerê jinan dest bi serhildanê kir. Bi boneya çaremîn salvegera qetilkirina Jîna Emînî û Serhildana ‘Jin Jiyan Azadî’ li Wargeha Penaberan a Şehîd Rûstem Cûdî (Mexmûr) daxuyanî hat dayîn.
Daxuyanî li ber avahiya Meclisa Îştar a Mexmûrê bi deqeyek rêzgirtin ji bo giyanê Şehîdên Şoreşa ‘Jin Jiyan Azadî’ hat destpêkirin. Piştî rêzgritinê daxuyanî ji aliyê Rojnemevan Mizgîn Kara ve hat xwendin.
Daxuyanî wiha ye:
“Ji bo raya giştî
Di salvegera çaremîn a şoreşa ‘Jin, Jiyan, Azadî’ de, di şexsê Şilêr Resûlî û Jîna Emînî de em hemû şehîdên şoreşê bi rêz û minet bibîr tînin.
‘Jin, Jiyan, Azadî’ netenê dirûşmeya protestoyê ye, em wek perspektîfa siyasî û civakî ku jinê bingeha avakirina civakeke demokratîk, azad û wekhev dibînîn. Ev şoreş bi hêza jinan bûye nîşana berxwedanê ya li hember zordarî, cudakarî û hemû cûreyên bindestiyê. Jin di vê têkoşînê de ne tenê beşdarin, di gelek waran de pêşengiya dikin. Li hemberî pergala mêr-dewlet, li hemberî siyaseta şer, dagirkerî û qirkirina jin û civakê, jin têkoşîna hebûnê û parastina nirxên mirovahiyê dimeşînin. Parastina hebûn û îradeya azad, bi têkoşîneke radîkal û bi ruhekî hevpar wê bi ser bikeve. Li hemberî aqlê ku qetilkirina jinê rewa û wekî mafekî dibîne, pêwîstî bi têkoşîneke hîn xurt û rêxistinkirî heye.
Civakek ku jin têde azad û wekhev nebe, nikare azad û demokratîk be. Ji ber wê yekê, têkoşîna ji bo mafên jinan tê dayîn, di heman demê de têkoşîna ji bo avakirina civakeke demokratîk û wekheve. Hemû kiryarên li ser jinan wê bibin sedema herî mezin a têkoşîna rizgariyê. Ev şoreş dê bibe ronesansa Rojhilata Navîn a serdema nû. Di salvegera şoreşê de pêwîste xwedîderketin û beşdariyeke ji her demê zêdetir çêbibe. Guhertina rast tenê bi guhertina kesan an qanûnan pêk nayê, pêwîstî bi guhertina hişmendî, têkiliyên desthilatdariyê û rêxistina civakê heye. Ji bo vê yekê rêxistinkirina jinan, xweseriya wan û beşdariya wan a di hemû qadên jiyanê de girînge. Em dixwazin vê rêbazê bihêztir bikin û dengê jinan, ciwanan û hemû kesên ku ji bo azadiyê têkoşînê didin, bilind bikin.
Di vê salvegerê de em bang li hemû hêzên demokratîk, rêxistinên jinan, ciwanan û civakê dikin ku li hember hemû cureyên zordarî û bindestiyê yekitiya xwe bihêz bikin û ji bo jiyaneke azad, wekhev û birûmet têkoşîna xwe bidomînin.”
Daxuyanî bi dirûşmeyên ‘Jin, Jiyan, Azadî’ û ‘Bijî têkoşîna jinan’ bi dawî bû.
