Albuma ‘Hevala Min’ a ji 8 stranan ku Komara Amara diyarî Şehîdên Azadiyê yên Kurdistanê kir, gihîşt ber destê muzîkhezan. Albuma ku bi hevkariya Awazgeha Delîla û Jê Muzîk ve hate amadekirin, ji 8 stranên ‘Derwêşo, Sara û Bîşeng’, ‘Vengê Avzem’, ‘Hevala Min’, ‘Çar Heval’, ‘Roniyê Me’, ‘Roj û Zarok’ û ‘Kezî’ pêk tê.
Ji TEV-ÇAND’ê Xwezan Harûn ku di pêvajoya amadekirina albumê de ked da û di heman demê de strana ‘Hevala Min’ nivîsî, li ser albumê ji ANF’ê re axivî.
‘DIVÊ EM XWEDÎ LI BÎRANÎNÊN HEVALÊN ŞEHÎD DERKEVIN’
Xwezan Harûn silav da gel, guhdar û hevrêyên xwe û li ser pêvajoya amadekirina albumê got, “Demek bû em li ser albuma xwe ya bi navê Hevala Min dixebitîn, niha jî gihîştin dawiya karê albumê. Em albumê bi guhdaran parve dikin. Weke ku tê zanîn, şehadeta hevalên me hate eşkerekirin ku me hev nas dikir, li eniyê li gel hev şer dikir û dixebitî. Em sersaxiyê ji malbatên şehîdan hemûyan re dixwazin û bi rêzdarî bejna xwe li ber bîranîna wan ditewînin. Di albûmê de me bi giranî ji bo hevalên xwe yên şehîd stran amade kir. Bîranînên me bi hev re hebûn, hevalên gelekî bedew bûn, lê mixabin ew heval ji nava me çûn û gihîştin heqîqetê. Divê em xwedî li bîranîna van hevalên xwe derkevin. Her çend têrê neke jî em bi van stranên xwe hevalên xwe bi bîr bînin.”
‘STRANA HEVALA MIN LI SER HEVAL ŞOREŞ HATE NIVÎSANDIN’
Harûn işaret bi pêvajoya amadekariya albumê û nivîsandina strana ‘Hevala Min’ kir û anî ziman ku di albumê de endamên komê û hunermendên li derveyî komê jî xebitîn.
Xwezan Harûn bi dewamî got, “Ji bo albumê gelek ked hate dayin. Ji bilî hevalên Ferîde û Pelşîn ên li nava komê, stranên hevalê Mazlûm Awaz jî di nava albumê de hene. Van hevalan li ser hevalên xwe yên şehîd stran nivîsandin. Gotin li ser jinên li ser rêya azadiyê nivîsîn.
Strana ‘Hevala Min’ a albumê li ser heval Şoreş hate nivîsandin. Şoreş Semsûr di nava Koma Amara de bû. Hevalek bû ku em bi salan bi hev re xebitîn û demeke bedew bi hev re derbas kir. Di sala 2019’an de di êrişa hewayî ya dewleta Tirk de li Herêmên Parastinê yên Medyayê şehîd bû. Şehadeta hevala Şoreş bandoreke giran li me hemûyan kir. Yek ji hevalên ji nava komê herî zêde bi heval Şoreş re ma ez bûm. Ji ber vê yekê hesreta min a ji bo heval Şoreş û wateya bîranînên me yên bi hev re ji bo min gelekî mezin bû.”
‘MIN GOTIN Û MUZÎKA STRANÊ BI HEV RE AMADE KIR’
Harûn qala pêvajoya amadekirina strana ‘Hevala Min’ kir û diyar kir ku gotin û muzîka stranê bi hev re amade kir. Harûn got, “Em hêvîdar in ku strana Hevala Min û stranên me yên din ên li albumê bi dilê we be. Em careke din hevalên xwe yên şehîd ên di dema dawî de şehadeta wan hate ragihandin bi bîr tînin û silav û hezkirinên xwe ji malbatên wan re dişînin.”
ALBUM JI 8 STRANAN PÊK TÊ
8 stranên di albumê de bi vî rengî ne:
* Derwêşo, Sara û Bîşeng
* Vengê Avzem
* Hevala Min
* Çar Heval
* Roniyê Me
* Roj û Zarok
* Kezî
Album li ser vê navnîşana Youtube dikare bê peydakirin:
