Saziya Ziman û Perwerdeya Civaka Demokratîk a Şengalê li Dibistana Xerbat Qewala bi daxuyaniyekê cejna Zimanê Kurdî pîroz kir. Li ser navê saziyê daxuyanî ji aliyê mamostaya zimanê Kurdî Xalîda Şengalî ve hate dayîn.
Daxuyanî wiha ye:
“Ziman çand û heqîqeta civakê ye, ziman hebûn û nasnameya civakê ye.
Dema mijar dibe çand û ziman bingehê civakê tê fêmkirin, ji ber ku tu civak bê ziman û çand nabe. Zimanê mirov heqîqeta mirov e, ji bo wê berpirsiyariya me hemûyan ewe ku em li ziman û çanda xwe xwedî derbikevin.
Ziman çalakiya mirov a bingehîn e, ji ber ger em bi zimanê xwe binivîsin, bixwînin û biaxivin wê demê em ê çand û zimanê xwe nas bikin.
Ziman stûna bingehîn a civakê ye. 15’ê Gulanê ji bo zimanê Kurdî rojekî taybet û girîng e. Ji ber ziman bi her alfebeyê tê karanîn, her alfebe jî taybetiyek a wê heye. Lê di nava van alfebeya de alfebeya herî kêrhatî û dewlement alfebeya Latînî ye.
15’ê Gulanê roja zimanê Kurdî ye. Em wek saziya Perwerdeyê ya Şengalê vê rojê pîroz dikin û dibêjin em xwedî li ziman û hebûna xwe derbikevin. Ji ber ziman kelha herî asê ya parastina mirovan e. Her zimanek, dîrokek, çandek û wêjeyek civakekê dide pênasekirin.
Li zimanê xwe xwedî derketin li çanda xwe xwedî derketine. Em bi zimanê xwe binivîsin û biaxivin da ku em ratiya xwe ji bîr nekin. Ji ber zimanê me heqîqeta me ye. Careke din em weke saziya perwerdeya civaka demokratîk a Şengalê vê rojê pîroz dikin. Em hebûn û nasnameya xwe bi parêzin.”
Piştî daxuyaniyê, karnameyên xwendekaran hatin dayîn.
