Ajansa Nûçeyan a Çalakvanên Mafên Mirovan (HRANA), derbarê cezayên darvekirinê yên ku ji destpêka şerê Îsraîl/DYA û Îranê ve li Îran û Rojhilatê Kurdistanê hatine bicihanîn, raporek weşand.
Di raporê de hat destnîşankirin ku di pêvajoya şer a 25 rojan û piştî wê de, li Îranê herî kêm 31 kes hatine sêdarekirin ku 22 ji wan girtiyên siyasî ne. Hat ragihandin ku hin girtî bi sûcdariyên wekî “sîxurî û endamtiya hêzên mûxalif” hatine darvekirin.
Li gora raporê: Sala par ji 191 cezayên darvekirinê tenê %7 ji bo girtiyên siyasî bû. Di çaryeka yekem a îsal de, ev rêje derket %71’ê.
Hat eşkere kirin ku ligel polîtîkayên nû yên zextê, 16 xwepêşanderên ku di çalakiyên dawî de hatibûn girtin, bi sûcdariyên “şerê li dijî dewletê, serhildan û xerabkirina serûberiya giştî” bi cezayê darvekirinê hatine mehkûmkirin. Di raporê de hat tekez kirin ku ev yek wekî hewildanek ji bo bêdengkirina dengên mûxalif û zêdekirina tirsê di nav civakê de tê nirxandin.
HRANA’yê diyar kir ku di van biryaran de dadwerên wekî Îmam Afşarî û Ebûqasim Salavatî roleke sereke lîstine. Her wiha hat ragihandin ku destûr nayê dayîn girtî bi parêzerên xwebexş re hevdîtinê bikin û di hefteyên dawî de sepandina “îtirafên bi darê zorê” bi astekî girîng zêde bûye.
