Tevgera Jinên Azad (TJA) bi boneya 4’ê Nîsanê rojbûna Rêber Apo dest bi çalakiya xwe ya ku wê bi şîara ‘’Dema jinan, dema hevdîtina azadî û Rêbertiya azad e’’ li dar bixin, kirin. Jinên ku wê di 1’ê Nîsanê de dest pê bikin û heya 19’ê Nîsanê li qadan bin, wê di 4’ê Nîsanê de li Amarayê bi rê bikevin û li gel bi hezaran jinan ber bi Gemlîkê ve bimeşin.
Jin wê di 19’ê Nîsanê de li Gemlîkê li dijî polîtîkayên şerî aşitî û azadiyê qîr bikin.
Di bernameya berfireh a ku wê 1’ê Nîsanê dest pê bike de; çandina daran, atolye, festîval, meş û çalakiya bafirokê û meşên bi meşaleyî cih digirin. Wê her bajar bernameya xwe li dar bixe û wê beşdarî festîvala ku wê di 4’ê Nîsanê de li Amarayê were lidarxistin, bibin. Piştî festîvalê wê di 4’ê Nîsanê de li gel girseya li navçeyê ber bi Amarayê ve meşek were lidarxistin. Jin wê piştî axaftin û çalakiyên li Amarayê ji bo meşa mezin a ber bi Gemlîkê ve bi rê bikevin.
Aktîvîsta TJA’yê Rûken Zeryam Işik Yildiz bal kişand ser çalakiyên ku wê werin lidarxistin û girîngiya daxwaza aşitî û azadiyê ya di vê pêvajoyê de û diyar kir ku jin di vê pêvajoyê de biker in û bang li hemû kesan kir ku beşdarî vê xebatê bibin.
Jinên TJA’yî têkildarî armanc û naveroka xebata ku wê were lidarxistin, ji ajansa me re axivîn. Rûken Zeryam di destpêka axaftina xwe de diyar kir ku li gorî salên borî êdî daxwaz bi awayekî eşkeretir tên bilêvkirin û ev yek anîn ziman: ‘’Weke ku di şîarê de jî hatiye diyarkirin, êdî daxwaza azadiya fîzîkî ya Rêberê Gelê Kurd Abdullah Ocalan tê kirin. Weke tê zanîn ev saleke dawîn e pêvajoyeke ku hatiye destpêkirin heye. Li vê pêngava ku weke aşitî û civaka demokratîk hatiye destpêkirin dema ku em weke TJA’yê li çalakî û xebatên di saleke dawîn de hatine lidarxistin dinêrin, êdî bi peyamake zelal tên birêvebirin.’’
‘WEKE TJA’YÊ EM JI BO SERKETINA VÊ PÊVAJOYÊLI QADAN IN’
Rûken Zeryam piştre bal kişand ser geşedanên li herêmê û got: ‘’Dema ku em ji aliyê Rojhilata Navîn , Kurdistan û di heman demê de jinan ve lê dinêrin, tê dîtin ku krîzên mezin hene. Ji ber vê yekê jî bersiva ku ji vê yekê re bibe bersiv, pêngava aşitî û civaka demokratîk e. Di vê xalê de li gel îdîaya me ya bûna pêşeng û xwediyê vê pêngavê em li gel çalakî û xebatan li qadan in. Edî dem dema jinan e. Di pêşengtiya jinan de ji bo pêkhatina vê pêngavê û dabînkirin azadiya fîzîkî ya Rêberê Gelê Kurd Abdullah Ocalan em ê li qadan bin.’’
‘EM Ê DI ÇALAKIYAN DE DAXWAZÊN XWE YÊN AŞITÎ Û AZADIYÊ BÎNIN ZIMAN’
Rûken Zeryam hûrgiliyên têkildarî bernameya 4’ê Nîsanê parve kirin û diyar kir ku ew ê di van çalakiyan de bi taybetî balê bikşînin ser şerê li herêmê yê berfireh bûye û girîngiya aşitiyê û ev yek anîn ziman: ‘’ Çalakiyên me wê di 1’ê Nîsanê de dest pê bikin û li gel meşa li Gemlîkê ya di 19’ê Nîsanê de bi dawî bibin. Em ê li wir jî dîsa bi awayekî zelal daxwazên xwe bînin ziman. Di nava şerên heyî de herî zêde jin mexdûr dibin. Em dikarin bibêjin ku herî zêde jin tên cihêkirin, weke îrade nayên hesibandin û mexdûr dibin. Herî zêde pêdiviya jinan bi aşitiyê heye.’’
‘DIVÊ DAXWAZ BI YASAYÎ WERIN MISOGERKIRIN’
Rûken Zeryam Işik di dawiya axaftina xwe de da zanîn ku di çarçoveya pêvajoya hatiye destpêkirin de divê pêngavên sererastkirina yasayî tavilê werin avêtin û ev yek anîn ziman: ‘’Weke gelê Kurd, jin, ciwan û gelên din; em daxwaz dikin ku mafên weke ziman, çand û yasayî tavilê werin misogerkirin.
Em dibêjin ku ji bo parastina cidîyeta pêngava hatiye destpêkirin û belavnebûna wê ya weke di pêvajoyê beriya niha de temînata herî mezin girêdayî yasayan e. Ji ber vê yekê em dubare dikin ku divê yasa bi awayekî cidî werin amadekirin û hemû maf û daxwaz werin misogerkirin.’’
‘XEBAT WÊ BI ROJAN DEWAM BIKIN’
Aktîvîsta TJA’yê Nûrten Uzumcu jî têkildarî xebata ku tê birêvebirin bang li jinan kir. Nûrten Uzumcu bal kişand ser wateya 4’ê Nîsanê û got: ‘’4’ê Nîsanê rojbûna Rêbertî ye û ev rojbûn di rastiyê de vejîn û rojbûna hemû jin û gelan e. Em wisa lê dinêrin ûwisa pîroz dikin. Ji niha ve li ba hemû jinan moral û kelecaneke mezin heye. Hem di çarçoveya xebat û çalakiyên xwe yên xwecihî de hem jî di çarçoveya festîvala ku wê 4’ê Nîsanê li Amarayê were lidarxistin de em di nava tempoyeke xebatê ya zêde de ne.’’
‘GEL XWEDÎ LI PÊVAJOYÊ DERDIKEVE’
Nûrten Uzumcu piştre bal kişand ser xwedîlêderketina pêvajoyê û ev yek anîn ziman: ‘’Me hem di 8’ê Adarê de hem jî di pîrozbahiyên Newrozê de dît ku gel çawa xwedî li pêvajoya ku di 27’ê Sibatê de hatiye destpêkirin, derdikeve. Yekbûna van dengan û ev xwedîderketin li hemberî gîrokirina pêvajoyê û paşveneçûna wê ya weke tê xwestin bersivek e. Em diyar dikin ku li gel van xebat û çalakiyan wê jin êdî zêdetir li qadan bin.’’
Nûrten Uzumcû di dawiya axaftina xwe de bang kir û got: ‘’ Ji aliyê serkeftina vê pêvajoyê û dabînkirina azadiya fîzîkî ya Rêber Apo ve wê hemû xebatên me bi vî rengî bin. Em dixwazin ji vir banga xwe ya ji hemû gelan û jinan re dubare bikin: Em bang dikin ku beşdarî festîvala ku em ê di 4’ê Nîsanê de li Amarayê li dar bixin û li gel vê yekê meşa li Gemlîkê ya xwedîlêderketina pêvajoyê û daxwaza azadiya fîzîkî bibin.’’
