Li peravên Bodrûmê yên li başûrrojavayê Tirkiyeyê bota koçberan binav bû û 18 koçberan jiyana xwe ji dest dan.
Ewlehiya Behrê ya Tirkiyeyê têkildarî bûyerê daxuyaniyek da û diyar kir ku di encama xebatên lêgerîn û rizgarkirinê de 21 koçber hatine rizgarkirin û cenazeyê 18 kesan jî hatiye dîtin.
Ekîbên Ewlehiya Behrê dan zanîn ku koma koçberan serê sibehê di saet 06.00’an de li ser behrê hatiye tespîtkirin. Di daxuyaniyê de hate îdîakirin ku botê guh nedaye hişyariya ‘’bisekine’’, bi lez reviyaye û piştre jî binav bûye.
Rayedaran dan zanîn ku lêpirsîna têkildarî bûyerê berdewam dike.
Bodrûma bajarê tûrîstîk, ji ber ku nêzîkî giravên girêdayî Yewnanistanê ye ev demeke dirêj e weke rotaya koçkirinê tê bikaranîn. Bi taybetî jî Girava Kosê, di derbasbûna ji bo wekatên Ewropayê de weke yek ji deriyê sereke yê li Egeyê derdikeve pêş.
Mesafeya di navbera Girava Kosê û peravên Tirkiyeyê de ji 5 kîlometreyan kêmtir e. Lê belê ev mesafeya kurt li gel derbasbûna keştiyên ne ewle gelek caran dibe sedema mirinan.
Li gorî Rêxistina Koçberiyê ya Navneteweyî (IOM), ji destpêka salê heya niha li Behra Spî herî kêm 831 koçber yan winda bûne yan jî cenazeyên wan hatine dîtin.
