Meşa ku ji aliyê Tevgera Jinên Azad (TJA) ve bi dirûşma “Bi hêvî ber bi azadiyê ve dimeşin” ji Amedê heta Enqereyê dest pê kir, di roja xwe ya sêyemîn de berdewam dike. Sibehê li navçeya Xelfetî ya Rihayê, li gundê Amara ku Rêber Apo lê ji dayik bûye, piştî bernameyeke li mala wî, jin ber bi Bêrecûkê ve ketin rê.
Piştî meşeke dirêj, jin gihîştin navçeyê û ji aliyê partîvanan û welatiyan ve bi coş hatin pêşwazîkirin. Jinan li qeraxa çemê Firatê bi dirûşman meş domand û daxwazên xwe anîn ziman. Jinên ku bi zarokên xwe yên biçûk beşdarî meşê bûn jî bal kişand. Jinan bi desmalên xwe yên spî peyama aştiyê dan. Jinên ku ji Pira Bêrecûkê derbasî rojavayê Firatê bûn, li vir daxuyaniyek dan.
HER GAV JI BO AZADÎ Û AŞTIYÊ YE
Hevşaredara Şaredariya Dêrsimê Birsen Orhan ku karê wê hatiye desteserkirin, diyar kir ku her gaveke wan ji bo azadî û aştiyê ye. Orhan got: “Em weke jinên Kurd ên di salên 90’î de gundên wan hatine şewitandin û hatine paşguhkirin, wek jinên Elewî yên hatine paşguhkirin, wek Gulîstan Doku ya windabûyî, weke Rojin Kabaiş a ku kiryarên wê hatine veşartin, wek Taybet Ana, ya ku bi rojan cenazeyê wê nehat rakirin, wek dayika Halise, ya ku cenazeyê kurê wê bi kargoyê jê re hat şandin, wek Nagihan Akarsel a li Silêmaniyê hate qetilkirin dimeşin.”
AŞTÎ BI AZADIYA ROJÊ TÊ
Birsen Orhan diyar kir ku wan bi serhişkî, bi israr û bi berxwedanê hêviya aştiyê zindî hiştine û got ku Pira Bêrecûkê pireke ku du gelan dike yek. Orhan bal kişand ser polîtîkayên wêrankirina ekolojîk û wisa got: “Aştî bi HES, RES û GES’an nayê. Aştî bi azadiya rojê tê.”
PÊVAJOA DIVÊ ZÛTIR BIMEŞE
Birsen Orhan anî ziman ku ew ê li dijî talankirina xwezayê têbikoşin û got: “We xwest xwezayê têxin bin serweriyê. Lê bila were zanîn ku em ê her tim li dijî van polîtîkayan bin. Em ji bo naskirina ‘Mafê Hêviyê’ dimeşin. Komîsyona ku li Meclîsê hatiye avakirin, bi dirêjkirina pêvajoyê dem tê winda kirin. Em dixwazin ku ev yek zûtir bibe. Banga me ji partiyên siyasî re ye: Pêvajoyê ji bo armancên xwe yên siyasî nekin qurban. Aştî li ser berjewendiyên siyasî ra ye. Aştî tenê bi têkoşîna jinan pêk tê.”
