Kongra Star a bajarê Qamişloyê bi daxuyaniyekê tundiya li dijî xwendekarên Zanîngeha Rojava ku di 17’ê Mijdara 2026’an de pêk, şermezar kir û piştgiriya xwe bi xwendekaran re anî ziman û bal kişand ser parastina zimanê Kurdî. Daxuyanî di hewşa Zanîngeha Rojava de hate dayîn.
Endamên Kongra Star û hejmarek xwendekar beşdarî daxuyaniyê bûn. Di daxuyaniyê de alên Kongra Star û Zanîngeha Rojava hatin hildan.
Daxuyanî bi zimanên kurdî û erebî hat xwendin. Rêvebera Kongra Star a bajarê Qamişloyê Ronas Birahîm El Yûnis bi kurdî û endama Kongra Star Necma Mihemed jî bi erebî xwend.
Daxuyanî wiha ye:
“Ji bo piştgiriya zarokên me û paristina zimanê me,
Em dayik, îro bi dengekî yekgirtî li kêleka zarokên xwe radiwestin û piștgiriyê didin mafê wan ê fêrbûna bi zimanê dayikê. Zimanê me tenê peyv nîne, ew nasname, dîrok û çanda me ye. Ji mafê zarokên me ye ku bi zimanê xwe bixwînin, binivîsin û pê serbilind bin.
Em dayik bawer dikin ku parastina ziman, berpirsiyariya hemûyan e. Em ê her tim piştgir û hêza zarokên xwe bin. Em naxwazin zimanê me di nav nifşan de winda bibe, ji ber ku ew mîrateya me ya hêja ye û zimanê bav û kalan e. Fêrbûna bi zimanê dayikê mafek bingehîn û beşek ji nasnameya her mirovekî ye.
Em bang li hemû kesan dikin ku rêzê ji zimanê me re bigirin û mafê zarokên me biparêzin. Bi dengekî yekgirtî û îradeyeke bihêz, em li kêleka zarokên xwe ne û zimanê.
Xwe diparêzin. Zarokên me hêviya sibê ne, zimanê me jî reh û bingeha hebûna me ye.”
Piştî daxuyaniyê dirûşmên “Bê ziman jiyan nabe” û “Zimanê me kurdî ye, mafê me destûrî ye” hatin berzkirin.

