Belgassim Hefter kurê fermandarê Lîbyayî Xelîfe Hefter bi du şîrketên Tirk re bi milyaran dolarî peyman mohr kir ku Serokkomarê AKP’yî Recep Tayyîp Erdogan Xelîfe Hefter weke ‘darbekar’ pênase dike û ji bo wî dibêje, ‘Hêzên Hefter li Lîbyayê êrîşî sivîlan, nexweşxaneyan û binesaziya tenduristiyê ya sivîl dikin’.
Li gorî nûçeya Libya Observer Fona Jinûve Avabûn û Pêşvebirinê ya Lîbyayê ku li rojhilatê Lîbyayê kar dike, bi du şîrketên Tirk re li ser projeyên tenduristî û binesaziyê peyman mohr kiriye. Dîrektorê Fonê Belgassim Xelîfe Hefter bi şîrketên Libco for Construction and Industry û Cavahir for Contracting, Construction, Industry and Trade re peyman mohr kir. Hate ragihandin ku proje wê li bajarên Bingazi, El Beyda, Şahat û Tobrukê bikevin meriyetê.
Li gorî peymanê wê rê bêne çêkirin, binesazî werin sererastkirin û nexweşxaneyên cemaweriyê yên pisporbûyî bêne avakirin. Ev peyman di demeke welê de hate kirin ku Bankaya Navendî ya Lîbyayê ragihand ku lêçûnên cemaweriyê yên sala 2024’an ji 224 milyar dînarê Lîbyayê derbas kiriye. Ji vê lêçûnê 123 milyar dînar ji aliyê Hikumeta Yekîtiya Neteweyî, 42 milyar dînar bi pevguhertina petrolê û 59 milyar dînar jî ji aliyê hikumeta paralel ve hate kirin.
Saddam Hefter kurê fermandarê Lîbyayî Xelîfe Hefter meha Nîsanê ya derbasbûyî li Tirkiyeyê serdana Fermandariya Hêzên Bejahî kiribû.
