Li bajarê Kobanê ku ev bû demeke amadekariyên cejna qurbanê tê kirin, hemû kel û pel bi miqdarekî gelekî biha tên firotin. Kesên ku dixwazin dihiyên xwe ango pezekî ji bo qurbana cejnê bikin, herî kêm 200 dolarê Emerîkî serê her pezekî divê bide. Hin ji wan jî heta bi 400-500 dolarê Emerîkî tên firotin. Gel jî ji ber bihabûnî nikarin pez û hemû pêdiviyên cejnê bikirin.
Bazirganê bi nave Xalid Hemo dibêje ku ew ji ber hatina cejnê, di demeke pêş de dest bi amadekariyan dike û got: “Cejna bihurî ne weke vê cejnê bû, ji ber ku hinekî miqdarê kel û pelan erzan bû. Lê îsal ji ber gumrika zêde li ser pêdiviyan, bi rengekî deh qatî tê firotin. Weke her kes jî dizane Kobanê di hemû alî de hate dorpêçkirin û gelek tişt li ser bajêr hatin qutkirin. Niha ji ber ku ev cejna qurbanê ye, gelek kes nikarin qurbanan bikin, ew jî ji ber bihabûna pez.”
Xalid diyar kir ku di ewila roja cejnê de ew berê xwe didin mizgeftê û nimêja cejnê dikin û got: “Piştî wê em berê xwe didin nava xelk û xizmên xwe û em cejna hev dikin. Hêviyê me di vê sala li pêşiya me de ku em bi hev re di nava aramiyê de bijîn.”
Dîrok Mehmûd jî got, “Ji ber cejnê em şîraniyê dikirin û cil û bergên nû ji zarokên xwe re dikirin. Lê ji ber bihabûnê jî hin kes nikarin pêdiviyên xwe bi rengekî giştî bikire. Niha ji ber cejna qurbanê ye, pez jî bi awayekî biha tê firotin. Em jî vê cejnê li şehîdên xwe, Rêberê xwe û hemû gelê Kurd pîroz dikin û em ê jî di nava azadiyê de bi hev re weke Kurd êdî bijîn.”
