Cejna Remezanê ji bo gelê Misilman cejnek pîroz e. Her sal ji aliyê Misilmanan ve li çar aliyê cîhanê tê pîrozkirin. Bi taybetî jî li Bakur û Rojhilatê Sûriyeyê şeva cejnê û roja destpêka cejnê serdanên goristanên şehîdan tê kirin û find tên pêxistin.
Di vê cejnê de zarok li kolanan bi kêfxweşî digerin û şekiran kom dikin. Her wiha zarok cilên nû li xwe dikin û diçin serdanên malbatan û cejnê wek şahiyê pêşwazî dikin û diyariyan jî werdigirin. Di heman demê de cîran hemû li hev kom dibin û li pêşiya malên xwe rûdinin da ku şekiran li zarokan bigerînin.
Di vê cejnê de ji çanda herî sereke ew e ku nabe deriyê mala kesê Misilman were girtin û her kes jî bi cejnên pêkhateyên din kêfxweş dibe, ruxmî gelek pêkhateyên di vê herêmê de jî, ev cejn bi awayek hevpar tê pêşwazîkirin.
Gel hem di aliyê ewlekariyê hem jî di aliyê karên malê de, amadekarî dikin. Gelê Qamişlo bihatina cejna Remezanê kêfxweşî û amadekariyên xwe bi ajansa me re parve kirin.
Lewend Şêxmûs da zanîn ku cejna îsal ji gelek salên berê xweştir e ji ber ku gelek guhertin di vê salê de çêbûn û yek jê ketina Esed bû û wiha got: “Ji bo min cejna vê salê pir xweşe ji ber ku gel bi girseyî tevdigere û li hember her zehmetiyan serî hildide. Her wiha wek firoşkar jî karê me pir baş derbas dibe. Ez dikarim bibêjim meha me ya Remezanê giştî baş derbas bû. Nirxê xwarinên cejna Remezanî ji salên din baştir e. Lê belê hêviya me ji tevahî bazirganan re ew e ku nirxê tiştan hîn bêhtir erzan bikin da ku gel hemû bi kêfxweşî bikaribe cejna xwe pîroz bike.”
Lewend diyar kir ku bi ketina Esed re cejna wan veguherî du cejnan û got: “Di dawî de jî ez dibêjim hêviya me ew e ku aramî bikeve nav civakê û her kes bi kêfxweş li xaka xwe cejnên xwe pîroz bike.”
Welatiyê bi navê Yûsif Mihemed diyar kir ku ew vê cejnê pir baş dibîne û wiha dest bi axaftina xwe kir: “Bi ketina Esed re moralê me pir bilind bû, em pir kêfxweş bûne. Dema rejîm li vir bû em difetisandin û cejnên me nexweş bûn. Lê belê dema ev rejîm şkest em êdî dikarin cejna xwe xweş bikin. Her wiha nirxê tiştan ji salên berê pir baştir e, ji ber ku dema rejîm li vir bû nîvê pereyan ji xwe re dibir û heya alav digihiştin gel, nirxê wan pir buha dibû. Di heman demê de tevgera gel jî di vê salê de pir başe û em hêvî dikin ku wisa bimîne.”
Yûsif di di dawiya axaftina xwe de wiha hêviya xwe anî ziman: “Em ji bilî aramiyê tiştek din naxwazin, em gelên xwedî aştî ne û em ji şer hez nakin. Bi vê yekê pêwîste em bi hev re cejnên xwe bi kêfxweşî pîroz bikin.”
