Komek çalakvan li meydana Tehrîr a Bexdayê bi boneya 11’emîn salvegera Fermana Şengalê kombûn û xwestin çalakiyek bîranînê li dar bixin. Lê hêzên ewlekariyê xwestin çalakiya wan asteng bikin û axaftinên nexweş ji wan re kirin.
Çalakvana bi navê Dinya Taê axivî û got; “Em dilsoziya xwe ya bi qurbaniyên Êzidî re dubare dikin, piştî 11 salên ser jenosîdê re hîn jî saziyên dewleta Iraqê fermanê weke jenosîd nenasiye. Herwiha hîn jî yasaya rizgarbuyên Êzidî bicih neaniye, mixabin bi nêzîkbûna hilbijartinê re berpirs dixwazin mijara Êzidiyan bikin propagandaya hilbijartinê.
Di dewama axaftina xwe de Dinya dibêje; “Biryar ew bu ku em li Bexdayê bi şandek Şengal û pêkhateyên cûda yên Iraqê re, li meydana Tehrîr kom bibin û çalakiyek lidarbixin. Ev çalakî jî peyamek ji bo wijdana Iraq û cîhanê ye ku em ji wan re bêjin, em yek pêkhate û yek gelin. Mixabin ên ku sedema qeyran û terorê bûn, îro jî hewl didin me parçe bikin. Em ji helwesta hêzên ewlekariyê matmayî man. Ji ber ku efserek îro ji mere got, hun kaosê di afirînin, em matmayî man.”
Dinya bang li serokwezîrê Iraqê kir ku çawa dibe çalakiyek wiha weke kaos bidin nasîn û got; “Erkê hêzên ewlekariyê parastina welatiyan e.”
Nivîskar Subhî Bedrî jî ku tevlî çalakiyê bû got; “Ev çalakî ji bo desthilatdarên Iraqê peyamek zelale, ji ber ku di dema jenosîda Şengalê de bûn temaşevan û rawestiyan. Em dibêjin gelek caran kiryarên terorî, bi piştgiriya hêzên siyasî çêdibe. Berpirsyartiya vê jenosîda li Şengalê, dikeve ser stûyê hemû hêzên civaka sivîl, medya û civakê hemû. Hîn jî ev mijar nebûyî cîhanî, piraniya xelkê Şengalê bûne qurbanî, nerazîbûna dijî vê karesatê heya niha jî dewam dike.”
Çalakvana civaka sivîl Buşre Ebu Îsa jî ji ajansa mere axivî û got; “Çalakiya îro ji bo hevxemiya bi xwişk û birayên me yên Êzidîre bû, em bang Ii Hikumeta Iraqê dikin ku bi awayek fermî fermana Şengalê weke jenosîd binase. Divê yasaya rizgariyên Êzidî bicih bîne û dest bi reform û tazmînat dayînê bikin. Divê Şengal were avakirin, ji ber ku Êzidiyên vegeriyane Şengalê koçberin û pêwîstiya wan bi alîkariyê heye.”
Çalakvanê civaka sivîl Ehmed Star jî li ser heman mijarê axivî û got; “Ez sersaxiyê ji hemû Êzidiyan re dixwazim, îro em ji bo piştgiriya Êzidiyan û şermezarkirina fermanê livir kombûne. Lê helwesta hêzên ewlekariyê nexweş bû û em red dikin. Çawa dibe efserek henekên xwe bi pêxistina mûmek ji bo şehîdan bike? Em îro ji vê helwestê matmayî man, me xwest bi vê çalakiyê qurbaniyên jenosîdê bibîrbînin.”
