Li gelek bajaran bi hezaran kes li dijî êrîşên HTŞ’ê yên li ser Heleb û Bakur û Rojhilatê Sûriyeyê daketin kolanan û çalakî li dar xistin. Di çalakiyan de xwestin ku li dijî êrîşan bêdeng nemînin û bang li civaka navneteweyî kirin ku bi berpirsiyarî tevbigerin.
ÎZMÎR
Platforma Saziyên Demokratîk a Îzmîrê ji bo protestokirina êrîşên li ser taxên Şêxmeqsûd û Eşrefiyê yên Helebê li Bircê Saetê ya Gediz Bûcayê daxuyanî da. Dema ku pankartek bi nivîsa “Em li hember komkujiya li Rojava bêdeng namînin. Çareserî manîfestoya civaka demokratîk e” hate daliqandin, dirûşmeyên wekî “Bijî Serok Apo”, “Bijî berxwedana Rojava” û “Jin, jiyan, azadî” hatin berzkirin.
Rêvebera DEM Partiyê ya Bûcayê Berfîn Yildirim Okmen diyar kir ku êşkence û teşîrkirina şervanên jin êrîşek bi zanebûn li dijî îradeya civakî ya azadîxwaz e. Berfîn Yildirim Okmen got, “Ev êrîş êrîşeke hişmendî û îdeolojîk e li dijî felsefeya Jin, Jiyan, Azadî ku li Rojava derketiye holê ye.”
Parlamenterê DEM Partiyê Îbrahîm Akin diyar kir ku ew ji ber bûyerên li Rojava, Heleb û Îranê pir bi fikar in û bandorê li hemû gelan dikin.
her wiha li ber avahiya DEM Partî ya Karabaglarê daxuyanî hat dayîn. Aktîvîsta Tevgera Jinên Azad (TJA) Emîne Bozdag diyar kir ku bêdengiya li hember komkujiyên li Rojava nayê qebûlkirin.
EDENE
Bi sedan kesan li ser banga Platforma Saziyên Demokratîk a Edeneyê li taxa Kuçukdîkîliyê meşek meşaleyî li dar xistin. Di meşê de wêneyên Fermandarê Hêzên Ewlekariya Hundirîn ê Helebê Ziyad Helep û şehîdên din hatin hilgirtin. Girseyê gelek caran dirûşmeyên “Rojava wê DAÎŞ’ê re bibe goristan”, “Bijî Rêber Apo” û “Bijî berxwedana QSD’ê” berz kirin. Ciwanan bi fîşekên hewayî û jinan jî bi tilîliyan piştgirî dan meşê. Girseya ku li Kolana Şehîtlikê meşiya û deqeyek rêz girt û sirûda “Çerxa Şoreşê” got. Dema ku girse belav bû, polîsan bi hinceta pankartê binçavkirin kir.
ŞIRNEX Û ÊLIH
Li navenda Şirnexê jî bi sedan kes bi berzkirina dirûşmên “Bijî berxwedana Rojava” li nava taxan meşiyan. Li Êlihê ciwanan ji bo şermezarkirina êrîşan li taxa Îpragazê lastîk şewitandin.
ENQERE
Li taxa Tûzlûçayir a Enqereyê girseya gel li hev civiya û tevî astengiyên polîsan jî pankarta “Berxwedana Rojava ciwan e” vekirin û ji kolana Abîdîn Aktaş heta Parka Feyzullah Çinar meşiyan.
Parlamenterê DEM Partiyê Huseyîn Olan diyar kir ku “Rojava rûmeta Kurdên ku îro li çar beşên Kurdistanê û li çaraliyê cîhanê dijîn e; ew sembola berxwedanê ye.”
Olan anî ziman ku Rojava ji bo Kurdan xeta sor e û Kurd wê tu carî tawîzê nedin.
Endama Meclîsa Ciwanan a HDK’ê Dîlara Ercanli diyar kir ku ciwan wê berxwedana xwe ya li dijî êrîşan bidomînin.
çalakî bi çepik û dirûşmeyan bi dawî bûn. Beşdaran banga berdewamiya hevgirtinê li dijî êrîşên li Rojava û Helebê kirin.
MÊRSÎN
Meclisa Ciwanan a Mersînê ya DEM Partiyê jî li dijî êrîşan meşek li dar xist. Ciwan li ber avahiya navçeya Akdenîzê kom bûn û di nav taxan de meşiyan.
Di tevahiya meşê de, ciwanan deng derxistin û ji bo piştgiriya berxwedana li Rojava dirûşm berz kirin.Li taxên ku ciwan lê meşiyan, welatiyên ku derketin balkonên xwe bi nîşanên serketinê piştgiriya xwe ji bo çalakiyê nîşan dan.
SÊRT
Li Sêrtê, girse bi dirûşmeyên “Bijî berxwedana Rojava”, “Rojava Rojhilat e, Kurdistan yek welat e” û “Bijî Serok Apo” berz kirin û fîşekên hewayî pêxistin.
WAN
Li taxa Îstasyon a navçeya Tûşba û taxa Xaçort a navçeya Riya Armûşê ya Wanê, ciwanan agir pêxistin û êrîşên çeteyên HTŞ’ê bi dirûşmeya “Bijî berxwedana Rojava” protesto kirin.
Çalakiyên li dijî êrîşan berdewam dikin.
