Li gorî agahiyên ji çavkaniyên xwecihî yên Rojhilatê Kurdistanê hatine belavkirin, sê ciwanên Kurd ên xelkê Dereşehr a ser bi parêzgeha Îlam û niştecihên bajarê Kerec bi 9 sal û 3 meh cezayê girtîgehê hatine mehkûmkirin.
Hate ragihandin ku Mihemed Emîn Şemsî, Emîr Îmrayî û Kamyar Îmrayî ku cezayê girtîgehê bi ser de hatine sepandin, di xwepêşandanên vê dawiyê yên gelên Îranê de hatibûn binçavkirin.
Ev her sê ciwan di dema binçavkirinê de gelek caran ji aliyê pasewanên girtîgeha Qizilhesar ya Kerecê ve hatine êşkencedan û 10 rojan di hucreya yekkesî de bêyî ku cihê wan were diyarkirin hatine girtin. Her wiha di dema binçavkirin û lêpirsînê de, rêgirî li hevdîtina gel parêzer û malbatê hatiye kirin.
Hêjayî gotinê ye ku tevî bang û hişyariyên saziyên mafên mirovan û rêxistinên navneteweyî yên têkildarî zêdebûna zilm û zordariya desthilatdariya Îranê li ser welatiyan bi taybet di van sê mehên bihurî de, dewleta Îranê gav paşde navêje. Her diçe girtin, êşkence û darvekirinên li dijî welatparêz, çalakvan û girtiyên siyasî zêdetir dibin.
