Bi wesîleya 77’emîn rojbûna Rêber Apo li navçeya Pirsûs a Rihayê bi dirûşmeya “Bi Rêbertiya Azad re ber bi yekîtiya neteweyî”, di çarçoveya Mihrîcana Rojên Amara de pîrozbahî hate lidarxistin. Gelek welatî tevlî pîrozbahiya ku li Parka Meydanê hate lidarxistin bûn. Welatî bi cil û bergên xwe yên herêmî li xwe kirin û li ber stranan govendê gerandin. Di tevahiya pîrozbahiyê de dirûşmeyên, “Bijî Serok Apo”, “Bê Serok jiyan nabe” û “Jin, jiyan, azadî” hatin berzkirin. Parlementerên Partiya Wekhevî û Demokrasiyê ya Gelan (DEM Partî) Ferît Şenyaşar, Onur Duşunmez û Mahmut Dîndar, Hevşaredarên Pirsûsê Ayten Kaya û Muslim Baran, rêxistinên DEM Partî û Partiya Herêmên Demokratîk yên navçeya Pirsûsê tevlî pîrozbahiyê bûn. Hunermend Azad Devrîm di pîrozbahiyê de derket ser dîkê.
‘STATUYA RÊBERTÎ STATUYA GELÊ KURD E’
Piştre, Hevserokê DEM Partî yê Rihayê Nihat Demirbileklî bal kişand ser girîngiya pîrozbahiyê û wiha got, “Hûn bi xêr hatin mihrîcana Rêberê Gelê Kurd Abdullah Ocalan. 4’ê Nîsanê ne tenê rojbûnekî ye, di heman demê de îfadeya zayînekî ye. Ev dîrok ji bo gelên Rojhilata Navîn û Kurdan nîşaneya destpêka nû ye. Em bi vê wesîleyê sala 77’emîn a rojbûna wî li gelê xwe pîroz dikin. Êdî dem dema gelê Kurd e. Statuya Rêbertî, statuya gelê Kurd e. Em ê têkoşîna xwe ji bo veguherîna Tirkiyeyê ji bo welatekî aştiyane û demokratik bidomînin. Bijî xwişk-biratiya gelan, bijî azadiya fîzîkî ya Rêber Apo.”
‘PÊVAJOYEKE DÎROKÊ TÊ JIYÎN’
Pişte, Ferît Şenyaşar axivî û diyar kir ku pêvajoyeke dîrokî tê jiyîn. Şenyaşar wiha got, “Rêberê Gelê Kurd Abdullah Ocalan vê pêvajoyê wekî Aştî û Civaka Demokratîk bi nav kir. Kurd şert û mercên ku Rêbertî raber kir, bi cih anîn. Di vê pêvajoyê de Kurd zede tîştek naxwazin. Ger ev welat ji aliyê Kurd û Tirkan re bi hev re hatiye avakirin, Kurd jî dixwazin bibin xwedî mafên ku di Tirkan de hene. Kurd nasname, mafê zimanê dayikêê û jiyaneke bi rûmet di van xakan de dixwazin.”
Piştî pîrozbahiya ku li Parka Meydanê bi dawî bû, li gundê Kulunçê ya Pirsûsê bi wesîleya 77’emîn rojbûna Rêber Apo 77 dar hatin çandin. Piştî ku dar bi dirûşmeya, “Bijî Serok Apo” hatin çandin, bername bi dawî bû.
