Di çarçoveya kampanyaya “Em hemû YPJ‘ê ne.. YPJ‘ê hebûna me ye” de ku di Nîsana îsal de ji bo piştgiriya YPJ‘ê û naskirina statuya wê hatibû destpêkirin, îro li Qamişloyê meşek girseyî hat lidarxistin.
Xelkên ji Qamişlo, Dêrik û Tirbespiyê, tevî bi dehan şervan û fermandarên YPJ‘ê, jinên çalakvan, rewşenbîr û endamên tevger û rêxistinên jinan ên herêma Cizîrê beşdarî meşê bûn.
Meş bi pêşengiya jinan û jinên ciwan ji Çerxerêya Sonî dest pê kir. Di meşê de alên YPJ‘ê û wêneyên şehîdên YPJ‘ê hatin hildan. Pankartên ku balê dikişînin ser rola YPJ‘ê di parastina maf û destkeftiyan de hatin vekirin. Her wiha bê navber jî dirûşmên “Em hemû YPJ‘ê ne”, “Jin, Jiyan, Azadî” û “Bijî YPJ‘ê hatin vekirin.
Meş li Qada Şehîdan a navenda bajêr veguherî mîtîngê û deqeyek rêz hat girtin. Piştre endama Koordînasyona Kongra Star Gulistan Gulo axivî.
Gulistan Gulo di axaftina xwe de berxwedana YPJ‘ê silav kir û wiha domand “Bi navê hemû tevger û rêxistinên jinan ên li herêma Cizîrê em gelê xwe û jinan silav dikin. Wekî tê zanîn me ji bo piştgiriya YPJ‘ê û daxwaza naskirina statuya wê kampanyeke daye destpêkirin. Di çarçoveya vê kampanyayê de, me ji Kobanê heya Hesekê û Qamişloyê meş li dar xistin. Em tevger û rêxistinên jinan ên li Ewropayê yên ku piştgirî dan vê kampanyayê jî silav dikin.”
Gulistan Gulo bal kişand ser nêzîkatiyên hikumeta demkî û ev li gotinên xwe zêde kirin “Di nava 14 salan de me ji bo avakirina Sûriyeyeke demokratîk û rûxandina rejîma Baasê ya ku welat wêran kir û mafên jinan diçewisand, şer kir û me têkoşîn kir. Hikumeta demkî hîn bêtir jinan diçewisîne, rola û îradeya wan paşguh dike. Beriya çend rojan Meclisa Gel ava kir, lê ev meclis dûrî îradeya gel û jinan e. Em van biryaran û nêzîkatiyan qebûl nakin.”
Gulistan Gulo anî ziman ku hişmendiya hikumeta demkî ya li hemberî jinan berdewama hişmendiya rejîma Baasê ye û wiha pê de çû “Hikumeta demkî li şûna ku spasiya YPJ‘ê bike û wê xelat bike, dibêje ew YPJ‘ê ya ku şerê DAIŞ‘kir û berdêl dan qebûl nake. Em jî dibêjin em vê rejîmê qebûl nakin û nûnertiya civaka me û jinan nake.”
Piştre Fermandara Yekîneyên Parastina Jin (YPJ) Rohilat Efrîn axivî.
Rohilat Efrîn diyar kir ku wan çawa roja yekem a şoreşê soz da ku dê xwedî li vê axê derkevin, îro jî soza wan ji dayîk û bavên şehîdan re, ji tevahî şehîdan re ew e ku dê vê axê biparêzin û wiha got: “Bi hezaran jin ji civaka mirovahiyê, ji civaka Kurd û ji pêkhateyên ku pişta xwe didin rûmetê, herkes bi yek dengî bi dengê ‘Em hemû bi YPJ’ê re ne’ gazî dikin. Helbet îro meşa li vir û Ewropayê jî çêdibe cihê rûmetê ne. Ne tenê rojek meş, ne tenê demjimêrek meş, li hemberî bêhiqûqî, newekheviyê li hemberî hêza ku dixwaze hêzeke pêşeng tarî bike disekine. Hemû jin, mêr û civak bi hişmendiyek ku dixwaze tune bike, newekheviyê, bêhiqûqî re rû birû ne. Divê serê xwe li hemberî vê hişmendiyê netewînin. Dema destpêka avakirina komara Sûriyeyê, hîn wê demê mafên jinan ên xwendinê, îdarî û di saziyan de hebû. Ev ne tiştekî nû ye, berê jî hat kirin û dê niha jî çêbibe. Heta di artêşê de jinan Sûriyeyî cihê xwe girtibû. Ji bo em wê dibêjin, parastina mafê jinan di destûra nû ya Sûriyeyê de bê mîsogerkirin, ev jî dê bi têkoşîna jinan û civakê pêk bê.”
Piştre kesek bi navê Cemal helbest li ser YPJ û QSD‘ê xwend. Mîtîng bi berzkirina dirûşmên “Bijî YPJ” û “Jin, Jiyan, Azadî” bi dawî bû.
