Rêxistinên gel ên Brezîlyayê CSP Conlutas, Luta Popular, Akademiya Femînîst a Abya Yala, Jinên di Têkoşînê de, Sendîkaya Karkerên Metal, AMPARAR (Komeleya Malbat û Kesên Girtîyan), Kolektîfa Jinên Bakurêrojhilat û enternasyonalîstên Eniya Parastina Gelê Filistînê, Tora Jinan – Avakirina Pêşerojê û Tevgera Jinên Kurdistanê, di salvegera damezirandina Tevgera Azadiya Kurdistanê û Cejna Berxwedana Neteweyî de li São Paulo’yê bi civîneke mezin hatin cem hev.
Li bajarê São Paulo’yê, ji bo nîqaşkirina amûrên têkoşîna rêxistinkirî ya li hemberî tundiya dewletan û giringiya enternasyonalîzma komunal, civîna tevgerên gel hate lidarxistin û cejn hate pîrozkirin.
Pîrozbahî bi lîstikeke şanoyê ya li ser çîroka enternasyonalîsta Arjantînî Şehîd Lêgerîn ku di Adara 2018’an de li Rojavayê Kurdistanê şehîd bûbû, destpê kir. Lîstik ji aliyê lîstikvana Brezîlyayî Rojda Dardara ve hate lîstin.
Endama Luta Popularê Irene Maestro di vekirina bernameyê de axivî û bal kişand ser giringiya yekbûna têkoşînê gelan û rola jinan a li hemberî polîtîkayên wêranker ên dewletan. Di heman demê de bang li beşdaran kir ku li ser enternasyonalîzmê, xwerêxistinkirina gelan û bajaran nîqaş bikin.
Piştre, nûnera Tevgera Jinên Kurdistanê axivî û giringiya damezirandina Tevgera Azadiya Kurdistanê û rola Rêber Apo ya ku di afirandina paradîgmayeke ku têkoşîna gel temsîl dike anî ziman. Li ser Konfederalîzma Demokratîk nîqaş hatin kirin û hate destnîşankirin ku ji bo li hemberî polîtîkayên qirkirinê yên hêzên hegemonîk, divê li asta navneteweyî torên têkoşîna gelan bên avakirin. Rêxistinkirina jinan, yekitiya gelên têkoşer û parastina jiyanê bûn mijarên sereke yên nîqaşa kolektîf.
Endama AMPARAR’ê Railda Silva axaftina xwe bi vegotina têkoşîna ji bo azadiya girtiyan a li zîndananên Brezîlyayê berdewam kir. Bi argumanên xurt polîtîkaya cezayê ya dewletê ya li ser ciwan û malbatan rexne kir û bang kir ku ji bo mafên kesên girtî bên parastin.
Piştre Soraya Misleh ji navê Eniya Têkoşîna Filistînê axivî û bal kişand ser rawestandina şerê li dijî gelê Filistînê û banga yekîtiya têkoşînê kir. Soraya Misleh destnîşan kir ku tenê têkoşîna rêxistinkirî ya gelan dikare li hemberî vê qirkirinê bibe bend û giringiya piştgirî û hevkariya ji aliyê mirovî anî ziman.
Di nîqaşan de Sendîkaya Karkerên Metalê di têkoşîna gel de ramanên xwe yên li ser rola jinên karker û pêwîstiya parastina axê parve kirin. Endamên Luta Popularê jî ezmûnên xwe yên dagirkirina erdên ji bo avakirina qadên jiyanê yên li hemberî polîtîkayên dewletê û bidestxistina erdê vegotin. Hat diyarkirin ku li gelek herêmên Brezîlyayê ne tenê erd azad dikin, civakên xwerêxistinkirî yên li ser bingeha parastina axê ya gel ava dikin.
Endama Kolektîfa Jinên Bakurêrojhilat Ana Sueli ku ji taxên xizan ên São Pauloyê têkoşînê dike, diyar kir ku di bingeha têkoşîna wan de rola pêşeng a jinan heye. Ji ber vê yekê, yekitiya jinan li kû derê cîhanê be jî, ji bo fêrbûna û avakirina awayên xweparastinê yên xurt û saxlem giringiya mezin heye.
Civîn bi axaftina Irene Maestro ya ku bang li yekbûna gelan a li hemberî dewletan kir, bi dawî bû. Bi vî awayî dema ku damezirandina Tevgera Azadiya Kurdistanê û Cejna Berxwedana Neteweyî hate pîrozkirin, peyameke piştgiriyê ji Rêber Apo û gelê Kurd re hate şandin. Di peyamê de bi kurtî ev hebû:
“Ti kes nikare gelên yekbûyî têk bibe.”
