Çalakvan û şêniyên bi dare zorê ji gundên xwe koçber bûne, li pêşiya avahiya parêzgeriyê ya bajarê Siwêdayê xwepêşandan li dar xist. Xwepêşandêran hebûna hêzên hikumta veguhêz li gundewarê Siwêdayê red kir û daxwaza vegera ewle ya li gundên xwe kir.
Di xwepêşandanê de pankartên “Em gundên xwe terik nakin. Çi qasî dirêj bike em ê vegerin “, “Vegera ewle mafê xwezayî yê her welatiyekî sûriyeyî ye”, “Dewletên garantorên agirbestê li ku derê ne? “, “Siwêda erdê Paşan û milkê xelkê wê ye” û “Cihê terorîstan li herêmên Paşan tune ye” hatin vekirin.
Li Siwêdayê ji Tîrmeha îsal bi armanca ku bala raya giştî bikişînin ser doza vegera koçberan, serbestberdana kesên ji aliyê hêzên hikumeta veguhêz ve hatine revandin, mafê gelê Siwêdayê yê diyarkirina çarenûsa xwe, xwepêşandan tên lidarxistin.
Ji Tîrmehê ve gundên rojava yên Siwêdayî di bin kontrola hêzên hikumeta veguhêz û komên çekdar ên girêdayî wê de ne. Hêzên navborî ambargoyeke giran li ser bajar û gundewarên Siwêdayê ferz kiriye, rê nadin madeyên sereke wekî xwarin, derman û sotemenî derbasî herêmê bibin. Tenê alîkariyên ku rêxistinên navneteweyî wekî Bernameya Xurekê ya Cîhanê û Xaça Sor a Navneteweyî derbas dibin.
