Meclîsa Dayikên Aştiyê, Berdevka DEM Partiyê Ayşegul Dogan û parlamenterên Şirnexê yên DEM Partiyê beşdarî pîrozbahiyê bûn.
Pîrozbahiya ku gelek jin û ciwan tevlîbûn bi deqeyeke rêzgirtinê destpê kir. Dirûşma ‘Bijî Serok Apo’ li qada Newrozê deng veda.
Hevseroka Şirnexê ya DEM Partiyê Taybet Bîlge axivî û bang li gel kir ku xwedî li banga civaka demokratîk a Rêber Apo derkeve.
Alîkarê Hevserokên Giştî yên DBP’ê Huseyîn Bîrlîk jî got, “Birêz Ocalan 27’ê Sibatê bangeke gelekî dîrokî kir. Ev bang ji bo tevahiya gelên Rojhilata Navîn firsend e. Divê em hemû xwedî li vê firsendê derkevin.”
Bîrlîk êrîş û komkujiyên dewleta Tirk şermezar kir û got, “Em destê xwe yê aştiyê dirêj kirin, firsenda me heye ku em bi hev re bijîn. Li dijî yên ku hewl didin vê yekîtiya me xera bikin, em ê bi têkoşîna xwe wan têk bibin.”
Bîrlîk diyar kir ku divê ew xwe sist nekin û got, “Divê em deqeyekê jî nsekinin, xwe sist nekin. Divê em berpirsyariya xwe bi cih bînin û vê pêvajoyê bi ser bixînin.”
Berdevka DEM Partiyê Ayşegul Dogan jî binçavkirina Şaredarê Bajarê Mezin ê Stenbolê Ekrem Îmamoglû şermezar kir.
Ayşegul Dogan got, “Stenbol cihekî welê ye ku hemû gel bi hev re dijîn, Tirkiyeyeke biçûk e. Em qebûl nakin ku îradeya gelê Kurd, îradeya gelan bê desteserkirin.”
Ayşegul Dogan bal kişand ser banga Rêber Apo û got, “Ji bo Kurd, Ereb, Tirk û ji gelên din kes nemire divê em bi hev re têkoşînê bimeşînin.”
Di pîrozbahiyê de ku agirê Newrozê hate dadan Sorjiyan û Hozan Şervan hunera xwe pêşkêş kirin.
