Ji bo bîranîna yek ji kadroyên damezrîner ên PKK’ê Riza Altûn a 25’ê Îlonê ya li herêma Île-de-France ya Fransayê, Civaka Demokratîk a Kurd a li Fransayê (CDK-F) bang li gelê Kurd, dostan û nûnerên saziyan kir ku beşdar bibin. Hate ragihandin ku di çalakiyê de wê şehîdên azadiyê yên Kurdistanê jî bêne bîranîn ku dema dawî şehadeta wan hate ragihandin.
Daxuyaniya CDK-F’ê bi vî rengî dewam kir:
“Ev kombûn wê ji bo xwedîderketina li bîranîna cangoriyên têkoşîna azadiyê ya gelê Kurd, bîranîna mîrateya wan a têkoşînê û xwedîderketina li wan a li hişê me yê kolektîf wê pêk were. Çalakiya bîranînê di heman demê de wê bibe kombûneke girîng ku gelê me êş, hiş û piştevaniya hevpar nîşan bide.
Têkoşîna azadiyê ya gelê Kurd bi berdêlên mezin û fedakariyan gihîştiye vê astê. Xwedîderketina li bîranîna şehîdên vê têkoşînê, jibîrnekirina rabirdûya xwe ûu hurmeta li jiyana wan berpirsyariya hevpar a me hemûyan e ku bigihînin nifşên nû.
Berpirsyariya me ew e ku ne tenê bîranîna şehîdan di salvegera şehadeta wan de ye, berpirsyariya me ew e ku nirxên ku wan diparastin, têkoşîn û mîrateya wan bi bîr bînin. Di şexsê hevalê Riza de em şervanên azadiyê hemûyan ên ku dema dawî şehadeta wan hate eşkerekirin bi hurmet û minet bi bîr tînin.
Bi navê CDK-F’ê em bang li gelê xwe, dostên xwe, nûnerên sazî û komeleyan dikin ku beşdarî vê kombûna hişê hevpar û bîranînê bibin û xwedî li bîranîna Riza Altûn û şehîdan derkevin.”
Bîranîn wê 25’ê Îlonê (sibe) saet di 18:00 de li navnîşana Espace Venise, 30 route de Groslay, 95200 Sarcelles bê lidarxistin.
