Rêber Apo ku li navenda nîqaşên diyalog û çareseriya pirsgirêka kurd e û meha Cotmehê ya derbasbûyî ji aliyê rayedarên dewleta Tirk ve muxatabiya wî careke din hate qebûlkirin, hîn jî tecrîdkirî ye. Aliyê desthilatdariyê nîqaşên li ser pêvajoyê li mijarên ‘çekdanîn’ û ‘terorê’ asê dike. Raya giştî ya Tirkiyeyê li benda peyamên ji Îmraliyê ye. Di rewşeke bi vî rengî de rojnamevan Nezahat Dogan û Dîcle Muftuoglû ji bo biçin Îmraliyê, rojnamevan Dîren Yûrtsever jî bi rêya e-mailê ji bo karibin xwe bigihînin Rêber Apo serî li Wezareta Edaletê dan. Nezahat Dogan li ser serlêdanê ji ANF’ê re axivî.
Nezahat Dogan bal kişand ser nîqaşên li ser pêvajoyê yên ji Cotmehê û vir ve û got, ji bo bersivê ji pirsa ‘Gelo çi diqewime’ ya di mejiyê her kesî de ye peyda bike, xwestin hevpeyvînê bi muxatabê esasî yê meseleyê bi Rêber Apo re bike, lewma serî li Wezareta Edaletê dan. Nezahat Dogan got, “Bi gotinên Devlet Bahçelî re Abdullah Ocalan li meclîsê muxatab hate dîtin” û destnîşan kir ku ev rewş di çareseriya pirsgirêka Kurd a 100 salî de dikare bibe xaleke girîng.
‘NÊZÎKATIYA RAYEDARÊN WEZARETÊ ERÊNÎ BÛ’
Têkildarî serlêdana li Wezareta Edaletê Nezahat Dogan got, “Em gelekî matmayî hiştin” û bi vî rengî dewam kir, “Em çûn wezaretê û me got, ‘weke rojnamevan em ê serlêdanê bikin’. Ji me re gotin, ‘Hûn ê bi Abdullah Ocalan re hevpeyvînê bikin?’, me jî got ‘erê’. Her wiha ji me re gotin, ji bo pêvajoya serlêdanê bi lez û bez bê pêkanîn wê çi bikin. Ev nêzîkatiya erênî em matmayî hişt.”
‘JI BO SERLÊDANA LI ÎMRALIYÊ MEKANÎZMAYEKE TAYBET HATIYE AVAKIRIN’
Nezahat Dogan diyar kir ku rayedarên wezaretê ji bo serlêdanê nûmareyeke şopandinê dane wan û anî ziman ku li ser rêveçûna pêvajoya serlêdanê agahî ji wan re hate dayin, bi rêya nûmaraya ji wan re hate dayin wê karibin li serlêdanê bipirsin. Nezahat Dogan ragihand ku hîn bersivek ji wan re nehatiye dain û şîrove kir ku eşkere ye serlêdan wê di nava mekanîzmayeke biryardanê de bê nirxandin.
GELEK DERDORAN JI BO ÇÛYÎNA ÎMRALIYÊ SERLÊDAN KIRIN
Nezahat Dogan diyar kir ku li gorî çavdêriyên wê, gelek kesên din jî ji bo çûyîna Îmraliyê serlêdan kirin û got, “Di Pêvajoya Çareseriyê ya salên 2013-2015’an de piştgiriya civakê di ser rêjeya ji sedî 60’î re bû. Lê belê meclîs nedihat bikaranîn, aliyê xwe yê rêxistinên civakî yên sivîl û civaka sivîl kêm mabû. Her wiha MHP û CHP li ber vê rewşê radibûn. Di vê pêvajoya nû de, em ji serlêdanan fêhm dikin ku zemîna hevdîtinan ava bûye.”
Nezahat Dogan destnîşan kir ku eger zemîn hebe wê gelek rojnamevan bixwazin biçin Îmraliyê û hevpeyvînê bikin.
