Serokê Baroya Wanê Sînan Ozaras dûrxistina ji wezîfeyê ya Serokê Baroya Stenbolê Prof. Îbrahîm Ozden Kaboglû û endamên Desteya Rêveberiyê, lêpirsîna têkildarî Şareedariya Bajarê Mezin a Stenbolê (ÎBB), binçavkirin û girtin ji ANF’ê re nirxand û anî ziman ku bûyerên li Stenbolê diqewimin pêvajoyek e. Ozaras got, “Betalkirina dîplomayê, binçavkirin û girtin, tayînkirina qeyûm li Şaredariya Şîşliyê, nîşaneya wê yekê ye ku bûyerên bi salan e li bajarên Kurdan diqewime, êdî derbasî bajarên rojavayî bûne. Ya ku li Îmamgolû tê kirin bi temamî bêhiqûqî ye. Tayînkirina qeyûm li Şaredariya Şîşliyê, jiholêrakirina mafê hilbijartinê ye. Eger bi rastî jî serrweriya hiqûqê û demokrasî tê xwestin, divê ji aliyê hiqûqî ve gav bên avêtin, kku yek ji wan jî bidawîkirina tayînkirina qeyûman e. Mixabin dadgeriyê dikin amûrek.”
BAROYÊ WEZÎFEYA XWE KIRIYE
Ozaras bi bîr xist ku Baroya Stenbolê baroyeke ji 147 salan e û got, “Di bombardûmana Tirkiyeyê ya li ser Rojava de 2 rojnamevan hatin qetilkirin. Li ser qetilkirina Nazim Daştan û Cîhan Bîlgîn Baroya Stenbolê têkildarî parastina mafên mirovan û hiqûqê daxuyaniyek da. Li ser vê yekê lêpirsîneke bêhiqûqî hate destpêkirin. Di vê lêpirsînê de usûl û karê parêzeriyê li aliyekî hate hiştin. Di dawiyê de jî Firat Epozdemîr hate girtin. Di dewama vê yekê de jî di çarçoveya lêpirsînê de ji bo rêveberiya Baroya Stenbolê ji wezîfeyê bê dûrxistin li Dadgeha Hiqûqê ya Esliyeyê doz hate vekirin. Bi lez û bez biryar hate wergirtin û ji bo rêveberî bê xistin biryar hate dayin. Sparteya doznameyê îdîaya li ser karê li derveyî armanca xwe bû. Baro û hiqûqnas xwedî wê wezîfeyê ne ku mafên mirovan û azadiyan biparêzin. Ya ku Baroya Stenbolê kir jî ev bû. Ne karekî dûrî armanca xwe, lê di çarçoveya wezîfe û berpirsyariya xwe de kar kir. Armanc ji vê yekê bêdengkirina baroyan e. Hewl didin dengê baroyan bibirin.”
Ozaras destnîşan kir ku li hemberî bêhiqûqî û neheqiyê helwesta baroyan zelal e û diyar kir ku bi darbeya li hemberî Baroya Stenbolê re dixwazin hemû baroyan bêdeng bikin. Ozaras got, “Helwesta ku TTB, baroyan û parêzeran nîşan dan ew e ku parastin wê ti carî bêdeng nemîne.”
